БАРОИ ПӮСТИ СӮХТА АЗ ОФТОБ, КИ СӮЗИШРО БА ВУҶУД МЕОРАД

Дар чунин ҳолат аз шуоъзании такрории офтоб худро муҳофизат карда, зуд-зуд нӯшидани об, чойи кабуд ва ё шарбат муҳим аст.

1. Тарбандӣ мебояд кард: докаро дар оби хунук тар карда, ба ҷойи сӯхта гузоштан зарур аст. Он сӯзиш ва дардро кам карда, пӯсти дар офтоб сӯхтаро намнок нигоҳ медорад. Оббозӣ бо оби ширгарм низ муфид аст. Дар оби он ҳамроҳ кардани оҳори ҷуворимакка ё картошка, сода, бобуна ва садбарг низ манфиатбахш аст.
2. Ба ҷойҳои зарардидаи пӯст шираи сабр (алоэ) молидан лозим аст. Он пӯстро ором карда, намнок месозад ва дардро бартараф менамояд. Ҳамчунин, равғани сабр, наъно (пудина) ва зайтун дардро таскин мебахшанд.
3. Воситаи дастрас ва беҳтарин, маҳсулоти ширии турш аст, ба монанди ҷурғот, чакка, кефир ва амсоли инҳо. онҳо ба зудӣ пӯстро таскин бахшида, дардро рафъ менамоянд. Сафедаҳои таркиби ин маҳсулотҳо қабати муҳофизиро ба вуҷуд меоранду намегузоранд, ки рутубати пӯст зуд бухор гардад. Давоми рӯз муддати 15–20 дақиқа се-чор бор мебояд истифода кард.
4. Ҳамчунин, майдаи картошка ва ё бодиринг, ки дар ҳар хона қариб дастрас аст, барои бартараф кардани сӯзиши пӯсти сӯхта аз офтоб бас муфид аст. Ҳамчунин, полудаи помидор, омехтаи зардолу бо асал низ хеле таъсирбахш аст.