НИГОҲУБИНИ МӮЙҲО ДАР ФАСЛИ ЗИМИСТОН

Фасли зимистонро барои мӯйҳои сар як муддати нохуш метавон гуфт. Чунки дар ин фасл дар хона асбобҳои зиёди гармидиҳанда гузошта мешавад, ки мӯйҳоро зуд хушк мекунад. Ҳатто ҳавои сарди ин фасл таъсирашро ба мӯйҳои сар мерасонад. Бо кашидани кӯлоҳ дарҳол ҳис мекунед, ки мӯйҳоятон хушк шуда, ҷаззобии худро гум кардааст. Аз ин рӯ, мӯйҳои сар дар сардии зимистон ба нигоҳубини махсус ниёз доранд. Барои ин, шумо бояд аз якчанд маслиҳат истифода баред:

Кӯлоҳ. Дар хотир доред, ки чӣ тавр модарон моро ба кӯлоҳпӯшӣ маҷбур мекарданд. Ва шояд қисми зиёди он нафароне, ки маҷбурӣ кӯлоҳ ба сар мекарданд, дар ними роҳ онро аз сар мегирифтанд. Кӯлоҳ на танҳо шуморо аз шамолхӯрӣ, балки мӯйи сарро аз хунукӣ нигоҳ медорад. Агар хоҳиши пӯшидани кӯлоҳ надошта бошед, пас ақаллан як рӯймол ё гарданбанро ба саратон бандед. Аз ҳама муҳим ин аст, ки дар сардӣ ҳеҷ гоҳ бо мӯйҳои нам ба берун набароед. Зеро мӯйҳои нам дар хунуки ях карда, ба зудшикании онҳо оварда мерасонад.

Тарзи ороиши мӯй. Дар зимистон аз сабаби он ки дохиди бино аз ҳад гарм асту берун сард, мӯйҳо ҳамеша зери хатаранд. Аз ин рӯ, зимистон хубтараш ба ороиши мӯйи сар машғул нашавед. Дигар намудани ранги мӯй ё кардани химияро ба фасли баҳор гузоред, ки фоидаовар хоҳад буд.

Шустани мӯйҳои сар дар фасли зимистон. Ҳамчунин гуфта мешавад, ки зимистон мӯйи сарро бояд бо оби ширгарм шӯед. Зеро оби гармтар метавонад онҳоро зудшикан намояд. Ҳамчунин бо ҳарорати баланд истифода бурдани мӯйхушкунак (фен) мӯйҳои шуморо ба ҳолати дар боло зикршуда оварда мерасонад. Аз ин рӯ, бояд зимистон аз фен ва дигар асбобҳои барои ороиши мӯй пешбинишуда даст кашид. Дар сурати ба фен одат карданатон ҳарорати онро пасттар карда, истифода баред. Аз шонаҳои чӯбин истифода баред. Интихоби дурусти шона низ муҳим аст, зеро он пӯсти сарро маҳс мекунад. Маҳси хуб бошад, гардиши хунро беҳтар мегардонад. Шампуни махсусеро, ки барои нигоҳбини мӯйҳо пешбинӣ шудааст, интихоб намоед.  Зеро он шона кардани мӯйи сарро осон мегардонад. Ҳар бор баъди шустани мӯйи сар ба он балзам-кондисионер молед. Агар шампуни харидаатон ба мӯйҳоятон мувофиқ набошад, онро иваз намоед. Ин маслиҳат ҳатман ба шумо кӯмак хоҳад кард. Агар мӯйҳои дароз доред, пас ба нӯгҳои он диққати ҷиддӣ диҳед. Чунки дар сардӣ маҳз нӯгҳои мӯйи сар азоб мекашанд. Имрӯзҳо дар мағозаҳо малҳамҳои махсус барои нигоҳбини нӯгҳои мӯйҳои сар фурӯхта мешаванд. Метавонед аз онҳо истифода баред.

Таҳияи ПАРВИНА