ДУХТИ ГУРДОФАРИД

Ба як нигоҳ наметавон ӯро аз ҳамтоёнаш фарқ кард – болобаланд асту лоғарандому сафедгуна ва дар чеҳраи гарму самимияш табассуми нарм шукуфо. Ин духтари шаҳлочашми гесудароз дар гузораи умри хеш зиёд тамрини бадан кардаву дар муҳорибаҳои варзишӣ маротибҳо дастболо гаштааст.

Боре Соҳиба Азизоваро барои иӌрои нақши эпизодӣ дар филми мустанаде, ки сабти он дар ноҳияи Файзобод ӌараён дошт, даъват намуданд. Аввалин бор болои асп нишасту аз ҳаяӌон дилаш ба тапиш омад. Асп зуд ром шуду духтар бовар кард, ки дигар зимоми ихтиёр бар дасти ӯст. Баногаҳ чун тири аз камон ӌаста асп сӯи адир хез гирифт ва Соҳибаи ҳаросон аз бетаӌрибагӣ лаӌомро ҳуй доду аз қоши зин дудаста маҳкам дошт. Аз суръати баланд кулоҳ як сӯ ва гарданпечаш сӯи дигар ҳамел хӯрд. Лаҳзае пас асп ором шуду ба майдони сабт баргашт.

ӯе, ки дар 21 соли умри хеш дар санъати муҳорибаи варзишӣ устувона сабзидаву обу­тоб ёфта буд, бо тамоми вуӌуд эҳсос кард, ки саҳфаи тозае аз дун­ёи аспу аспдавонӣ ба рӯяш во гашта. Муддате чанд таассуроти бардоштааш ӯро тарк нагуфт ва билохира соли 2017 ба суроғи асп роҳ пеш гирифт сӯи Наврӯзгоҳи пойтахт. Устоди варзиши аспдавонӣ Каримӌон Саидов ба матлаби духтар гӯш доду аз хавфу хатари асптозӣ ҳарф зад. Соҳиба аз қатъӣ будани азми хеш гуфту собит кард, ки бо дунёи варзиши муҳорибавӣ кайҳост, ки ошност. Ризоият ба даст оварду зери роҳбарии ин устод ба тамрин пардохт.

Рӯзҳои аввали болои асп тозиданҳо барои ӯ гарон афтод. Рӯзе дар майдони аспдавонии Наврӯзгоҳ ба аспи шӯхшангу бозигаре нишаст. Соҳиба ба ӌасту хези ногаҳонӣ ва мисли бод давиданҳои ӯ тоб наоварда, афтиду пояш дар рикоб дармонд. Асп ӯро думболи худ кашола карду духтарак осеби сахти ӌисмонӣ дид. Баъди ин ҳодиса тасмим гирифт, ки аз ин шуғл даст кашад. Аммо мақоли «Моргазида аз банди ало метарсад» ба тинати мардонагии ӯ ҳеӌ рабте надошт. Пас аз чанд муддат ӯ боз ба тамрин баргашту афтиду хест, дасту дандон ҳам шикаст, вале бо ғайрату ӌасорати зиёд маҳорати баланди човандозиро аз бар намуд.

Асперо, ки барои тамрин ҳар рӯз саворӣ мекард, баробари ӌон дӯст дошт ва қандҳоро худ намехӯрду ба ӯ ҳадия менамуд. Ҳатто намехост ғайри ӯ дигар касе савори ин асп шавад. Аз дун­ёи асп ва эҳсоси ӯ зиёд бохабар гашт.

- Асп тарсу ваҳми инсонро ба зудӣ пай мебарад ва мекӯшад, ки чунин нафарро ҳарчи зудтар аз хонаи зин дур афканад, то ба ин васила дигарбора он шахс кӯшиши ба ӯ нишастан накунад. Баръакс, одамони бидуни тарс ва ӌасурро ҳис менамояд ва ором мегирад. Аспе доштам гарданшаху бадӌаҳл, ки ҳар нафаре болояш менишаст, ба замин меафканд. Бо чӯбчае ба ӯ таҳдид мекардам, ки шиҳа мекашиду ашк мерехт. Баъди меҳрубониҳоям меболиду менозид, - қисса кард Соҳиба.

ӯ, ки аз хурдсолӣ ба варзиши каратэ рӯ оварда буду дар ин ришта низ таӌрибаи баланд дошт, моҳи феврали соли 2020 ба шаҳри Тошканд барои иштирок дар мусобиқаи варзишии «Узбек ӌанг санъати» (Оzbek jang sanati) байни наврасону ӌавонон дар ин намуди варзиш даъват гардид. Баъди ба даст овардани ӌойи аввал ба ӯ кишвари мизбон пешниҳоди ширкат дар сабқати аспдавонӣ намуд.

Дар ин мусобиқаи байналмилалии аспсаворӣ миёни 10 кишвари Осиё Соҳиба Азизова ба гирифтани мақоми аввал сазовор гашт ва бо ду ӌоизаи аввали ин мусобиқа ба Ватан баргашт.

Аввалин бор дар синни 11 бо хоҳиши зиёди модар ба каратэ рӯ овард, аммо онро ҳеӌ намеписандид. Баъди як соли тамрин боре тариқи телевизион варзишгареро нишон ба гардан дид, ки болои сараш парчами кишвар парафшонӣ мекард. Аз фараҳу нишот ашк рехтанҳои ӯро дида, мутаассир гашт. Дигар ӌиддан ба тамрин пардохт ва баъди ду сол ба намуди варзиши каратэ - кёкушинкай шуғл варзид. Баъди 5 моҳи тамрин бо варзишгардухтари ботаӌрибае қувва озмуд ва бозиро бохт. Ба худ қавл дод, ки маротибаи дигар ҳатман ба ӯ ғолиб ояд ва чунин ҳам шуд. Ӌасорати духтарак аз мадди назари устодони варзиши якҳарбаҳои шарқӣ дур намонд. Соҳиба иштирокчии ҳамешагии чанд навъи мусобиқаҳо гардид. ӯ кунун нозукиҳои муҳорибаи тан ба тан, ушу - санда ва каратэ - шотоканро ба хубӣ омӯхта буд.

Моҳи декабри соли 2015 дар мусобиқаи кушоди шаҳри Душанбе оид ба каратэ – кёкушинкай байни кӯдакон ва наврасон дар вазни то 60 кг Соҳиба сазовори ӌойи дувум ва 19-уми ноябри соли 2016 дар ин навъи варзиш ӌойи аввалро ба даст овард. Моҳи августи соли 2016 дар мусобиқаи шаҳрӣ оид ба гӯштини тарзи озод дар вазни то 60 кг низ ӌоизаи аввали сабқатро соҳиб гашт.

Моҳи июли соли 2018 дар мусобиқаи кушоди шаҳри Ваҳдат оид ба варзиши кудо К-1 байни наврасону ӌавонон мақоми аввалро касб кард ва моҳи авгус­ти ҳамон сол бахшида ба Рӯзи варзишгарон дар мусобиқаи ӌумҳуриявӣ оид ба ушу байни наврасон ва ӌавонон низ ӌойи аввалро ба даст овард.

Соҳиба алҳол донишӌӯи курси 4-уми риштаи журналистикаи Донишгоҳи миллии Тоӌикистон аст. Тӯли 5 сол ризокори Кумитаи кор бо ӌавонон ва варзиши кишвар буда, дар ташвиқу тарғиби тарзи ҳаёти солим, пешгирии амалҳои номатлуб миёни наврасону ӌавонон ва тозаву озода нигоҳ доштани муҳит саҳми назаррас дорад.

Чун фарзанди бузурги хонадон ду бародари мактабхонашро ба варзиш ва обутоби бадан таҳрик дода, шарики бурду бохти онҳост. Соли сеюм аст, ки бародаронаш дар варзиши ушу - санда тамрин ва қувва меозмоянд. Гоҳе фориғ аз ҳама кор Соҳиба бо бародаронаш сӯи майдони Наврӯзгоҳи пойтахт мешитобаду ба онҳо ҳунари аспсаворӣ меомӯзонад. Волидон аз шуғли фарзандон агарчи қаноатманданд, ҳамоно дар оғози по ниҳодани Соҳиба ба арсаи санъати ӌангварӣ аз тансиҳатии ӯ хавф мебурданд, вале баъди даст­оварду музаффариятҳои духтар ташвишу беқарориро канор гузоштанду дигар монеъ нашуданд.

Моҳи апрели соли 2020 дар шаҳри Душанбе Соҳиба аз интихоби байналмилалӣ оид ба каратэ -до шотокан таҳти роҳбарии устоди дараӌаи байналмилалӣ Игор Садовников аз Россия сарбаландона гузашта, барои ширкат дар чемпионати ӌаҳон оид ба греплинг (шабеҳи муҳорибаи тан ба тан) дар шаҳри Абу-Дабии АМА роҳхат гирифт. Аммо бо сабаби хуруӌи сирояти коронавирус сафари ӯ ба таъхир афтод.

Алҳол Соҳиба дар маӌмаи варзишии «Аҳмад - сила»-и пойтахт зери роҳбарии мураббӣ Раӌабалӣ Баёнов аз муҳорибаи тан ба тан тамрин дорад ва барои ширкат дар мусобиқаи байналмилалии мазкур омодагӣ мегирад.

- Дар варзиши навъи греп­линг бори нахуст аст, ки дар мусобиқаи байналмилалӣ ширкат меварзам. То ба эътидол омадани вазъ мекӯшам, ки ягон лаҳза аз тамрин дур намонам ва бо омодагии ӌиддӣ дар ин чорабинии варзишӣ ширкат намояму ба орзуи дерини худ бирасам, парчами Тоӌикистони азизро дар ӌаҳон парафшон созам, - мегӯяд варзишгардухтари ӌавон Соҳиба Азизова.

Бале, он ки дар роҳи орзу қадам бармедорад, дар айни комёбӣ аст.

С. Шарифӣ