ҒОЛИБИЯТИ БОНУВОНИ ФУТБОЛБОЗИ ТОҶИК

Дастаи мунтахаби олимпии занонаи Тоҷикистон (U-23) дар чемпионати Ассотсиатсияи футболи Осиёи Марказӣ (CAFA), ки дар Душанбе ва Ҳисор баргузор шуданд, ғалабаи дуюмро ба даст овард.

Тавре Умаралӣ Сафаралӣ, котиби матбуотии Кумитаи миллии олимпии кишвар ба мо иттилоъ дод, дар даври навбатӣ футболбозони тоҷик бо тими миллии Туркманистон вориди майдон гардиданд. Бозӣ дар Варзишгоҳи марказии Душанбе доир шуд ва бо ҳисоби 2-0 ба фоидаи дастаи футболбоздухтарони тоҷик хотима ёфт. Голҳоро дар нимаи аввали бозӣ Некубахт Худододова ва Рафина Нормуротова вориди дарвозаи рақиб намуданд.

Ёдрас мекунем, дар даври 3-юми бозӣ, ки 25 ноябр дар Варзишгоҳи марказии шаҳри Ҳисор баргузор шуд, мунтахаби олимпии занонаи тоҷик рақибони худ аз Афғонистонро бо ҳисбои бузурги 5-1 мағлуб намуда буданд.

Чемпионати Ассотсиатсияи футболи Осиёи Марказӣ (АФОМ) миёни мунтахабҳои олимпии бонувони то 23-сола 22 ноябр оғоз гардида, дар он мунтахабҳои бонувони 6 давлати узви АФОМ – Тоҷикистон, Узбекистон, Эрон, Қирғизистон, Туркманистон ва Афғонистон ширкат меварзанд. Даври финалии чемпионат 28 ноябр доир мешавад. Санаи 28-уми ноябр дастаи мунтахаби олимпии занонаи Тоҷикистон (U-23) бо рақибонашон аз давлати Ӯзбекистон дар Варзишгоҳи марказии шаҳри Ҳисор бозӣ мекунанд.