ЭМОМАЛӢ РАҲМОН ПРЕЗИДЕНТИ КУМИТАИ МИЛЛИИ ОЛИМПӢ ИНТИХОБ ГАРДИД

Номзадии Эмомалӣ Раҳмонро ба ин вазифа аъзои Ассамблеяи Кумитаи миллии олимпии кишвар пешбарӣ карданд.

Ҳамчунин, зимни ҷаласа бо пешниҳоди президенти Кумитаи миллии олимпии Тоҷикистон Маликшо Неъматов муовини аввали президент, Баҳрулло Раҷабалиев дабири кулл ва Муҳаммадшо Абдуллоев мудири кулли КМО ҶТ таъйин шуданд.

Роҳбарони мақомоти давлатӣ, федератсияҳою созмонҳои варзишӣ ва сарпарастон, ки дар рушди варзиш ва тарғибу ташвиқи ҳаракати олимпӣ дар кишвар саҳми арзанда доранд, соҳиби сипосномаи КМО ва беҳтарин мураббиён бо мукофоти молӣ сарфароз шуданд.
            Ёдовар мешавем, ки Кумитаи миллии олимпӣ муаррифигари Тоҷикистон дар тамоми мусобиқаҳои минтақавӣ ва байналмиллӣ буда, тавассути ин ниҳод дастаҳои мунтахаби миллӣ дар бозиҳои осиёӣ, мусобиқоти минтақавӣ ва бозиҳои олимпӣ ширкат мекунанд.

Президенти Кумитаи миллии олимпӣ як вазифаи ҷамъиятӣ буда, тамоми ҷараёни ширкати Тоҷикистонро дар ин сабқатҳо раҳбарӣ мекунад. Ба ҷуз Тоҷикистон, Кумитаҳои миллии олимпии Озарбойҷон, Туркманистон ва Белорусро низ раисони ҷумҳури ин кишварҳо сарварӣ менамоянд.