ДАСТОВАРДҲОИ ЗАНОН ДАР ДАВРОНИ НАВИН

 Дар доираи омодагиҳо ба ҷашни бузурги миллӣ - Рӯзи Модар тибқи қарори Раиси вилоят «Дар бораи таҷлили Рӯзи Модар» дар толори Донишгоҳи давлатии ҳуқуқ, бизнес ва сиёсати Тоҷикистон конференсияи илмӣ-амалии вилоятӣ дар мавзӯи «Дастовардҳои занон дар даврони соҳибистиқлолии давлати Тоҷикистон» баргузор гардид.

Он бо мақсади татбиқи сиёсати давлат дар ҷодаи дастгирии занону бонувон, қадршиносӣ аз саҳми арзандаи онҳо дар ҳаёти ҷамъиятӣ, таъмини фаъолнокии минбаъдаи онҳо, таҳкими нақш ва мақоми занону модарон дар ҷомеа баргузор гардида, дар он олимон, собиқадорони меҳнат, фаъолон, устодону донишҷӯён ширкат доштанд.

Конфронсро сардори Раёсати кор бо занон ва оилаи Мақомоти иҷроияи ҳокимияти давлатии вилоят Хуршедахон Хоҷазода ҳусни оғоз бахшида, оид ба дастгириҳои пайвастаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти баланд бардоштани мақоми зан дар ҷомеа ва дастовардҳои солҳои охири занону бонувон изҳори андеша намуд.

Хуршеда Хоҷаева ҳамзамон бонуи сиёсатмадор, собиқадори меҳнат Муҳаббат Нозимоваро ба муносибати ҷашни 80-солагиаш муборакбод гуфта, табрикоти раиси вилоят Раҷаббой Аҳмадзодаро ба самъи ҳозирин расонид.

Сарходими Институти илмҳои ҷомеашиносӣ, профессори Донишгоҳи давлатии Хуҷанд ба номи академик Бобоҷон Ғафуров Умедахон Ғаффорова дар бобати «Саҳми занон дар рушди илм» суханронӣ намуда, нақши занону бонувонро дар рушди илму маориф, сиёсати давлатӣ фикру андешаи худро баён намуд. Ӯ иброз дошт, ки имрӯз дар кишвар занҳое фаъолият менамоянд, ки бо саҳми густурдаи худ гули сари сабади ҷомеа гардида, дар рушди илми тоҷик заминаи воқеӣ мегузоранд.

Ҳамчунин, муовини директори Маркази солимии репродуктивии вилоят Мадинахон Саидхоҷаева оид ба «Дастовардҳои занон дар соҳаи тандурустӣ» ибрози назар карда, таъкид дошт, ки имрӯз баҳри саломатии модару кӯдак дар муассисаҳои нигаҳдории тандурустии вилоят тамоми шароит муҳайё аст. Собиқадори меҳнат Биҳоҷал Раҳимова ба сухан баромада, изҳор намуд, ки ҳамаи дастовардҳои мо маҳз туфайли сулҳу ваҳдат ва оромии кишвар ба вуқуъ меояд. Аз ин рӯ, ҳар як зан, бонуи тоҷикро лозим аст, ки баҳри ободию осоиштагии кишвар саҳми боризе гузорад.

Дар охир донишҷӯён дар васфи зан, модар, олиҳаи ҳусну малоҳат шеъру таронаҳои ҷолиб қироат намуданд. Дастагули тарона пешкаши ҳозирин карда шуд.  

Гулҷаҳон МАҲКАМОВА