Ба 2367 нафар муроҷиаткунандагон ёрии равонӣ ва ҳуқуқӣ расонда шуд

 Дар Кумитаи кор бо занон ва оилаи назди Ҳукумати Ҷумҳурии Тоҷикистон бо мақсади пешгирии зӯроварӣ дар оила соли 2023 ҳуҷраи машваратӣ ва иҷтимоӣ ташкил карда шуд, ки то имрӯз ба он 62 нафар муроҷиат кардаанд.

Раиси Кумита Бунафша Файзиддинзода, дар нишасти матботӣ, ки санаи 12 феврал баргузор гардид, ба рӯзноманигорон иттилоъ дод, ки ба ҷабрдидагони хушунати хонаводагӣ дар соли 2023 Кумита ба 2367 нафар муроҷиаткунандагон ёрии равонӣ ва ҳуқуқӣ расондааст.

Муроҷиати шаҳрвандон ба Кумита асосан бо масъалаҳои гуногун, аз ҷумла тақсими мерос, ҷудо намудани алимент, баҳсҳои оилавӣ, баҳсҳои молиявӣ, маскункунӣ, таъмини ҷойи кор ва ғайраҳо мебошанд. Телефони боварӣ бо рақами 1313 дар хидмати аҳолӣ буда, бонувон метавонанд барои пайдо намудани роҳи ҳалли мушкилоти худ ба ин рақам занг зананд ва аз мутахассисон машварат гиранд.