Хадамоти зиддиинҳисорӣ 11,3 млн сомонӣ қонунвайронкунии зиддиинҳисориро ошкор намуд

Бо мақсади муайян намудани сабабҳои болоравии нархи маҳсулот дар бозор ва пешгирии баландшавии беасоси он, Хадамоти зиддиинҳисории назди Ҳукумати Ҷумҳурии Тоҷикистон дар доираи талаботи қонунгузорӣ ва ваколатҳои худ дар як қатор субъектҳои хоҷагидор санҷишҳои нақшавӣ ва ғайринақшавӣ гузаронид, ки дар натиҷаи онҳо қонунвайронкунии зиддиинҳисорӣ ба маблағи 11,3 млн сомонӣ ошкор ва ба буҷети давлатӣ гузаронда шуд. Ин нуктаро 7 феврали соли ҷорӣ муовини якуми Сардори Хадамоти мазкур Сафаралӣ Қурбонзода зимни нишасти матбуотии ниҳоди мазкур қайд намуд.

Ҳамзамон, бо фармоиши дахлдори Хадамот аз 23 июни соли 2022, № 29 ба номгӯи мол ва маҳсулоти аз ҷиҳати иҷтимоӣ зарурӣ, ки нархҳояшон таҳти танзими давлатӣ қарор дода мешавад, сатҳи ниҳоии даромаднокӣ дар корхонаҳои истеҳсолӣ то 10 фоиз ва барои маҳсулоти воридотӣ то 8 фоиз тасдиқ ва ва аз 15 июли соли 2022 то 30 июли соли 2023 мавриди амал қарор дода шуд.