Устодони ДДТТ забонҳои хориҷӣ меомӯзанд

Омӯзгорони Донишгоҳи давлатии тиҷорати Тоҷикистон дастуру супориши Сарвари давлат муҳтарам Эмомалӣ Раҳмонро ҷиҳати забономӯзӣ сармашқи кори худ намуда, тасмим гирифтаанд, то дастаҷамъона забони англисиро омӯзанд.

Ректори Донишгоҳ Хайрулло Холназар дар рафти нишасти матбуотӣ, ки санаи 31 январ баргузор гардид, ба хабарнигорон иттилоъ дод, ки шартномаи ҳамкорӣ бо Донишгоҳи Осиёи Марказӣ ҷиҳати омӯзондани забони англисӣ ба кормандони донишгоҳ ба имзо расидааст.

Дар соли 2023 бо мақсади баланд бардоштани маҳорати касбии омӯзгорон 50 нафар омӯзгори донишгоҳ аз курсҳои омӯзишии такмили ихтисоси Донишкадаи такмили ихтисоси омӯзгорони муассисаҳои таҳсилоти олии касбии назди Донишгоҳи миллии Тоҷикистон ва хориҷи кишвар гузашта, соҳиби диплом гаштаанд.

Ҳамчунин, дар Донишгоҳ ба хотири дар соли 2024 эълон шудани “Соли маърифати ҳуқуқӣ” ва баланд бардоштани сатҳи донишҳои ҳуқуқӣ курсҳои кӯтоҳи омӯзиши ҳуқуқ ташкил карда шудаанд.