Нақши Пешвои миллат дар таҳкими Истиқлол ва нумӯи Тоҷикистон

 Бахшида ба Рӯзи Президенти Ҷумҳурии Тоҷикистон ва Иҷлосияи 16-уми Шурои Олии Ҷумҳурии Тоҷикистон имрӯз 14-уми ноябр дар маркази вилояти Хатлон шаҳри Бохтар Конфронси илмӣ-амалӣ таҳти унвони “Нақши Пешвои миллат дар таҳкими Истиқлол ва нумӯи Тоҷикистон” баргузор гардид.

Конфронс бо ташаббуси мақомоти иҷроияи ҳокимияти давлатии вилояти Хатлон, Раёсати Кумитаи давлатии амнияти миллии Ҷумҳурии Тоҷикистон дар вилояти Хатлон ва Раёсати кор бо ҷавонон ва варзиши вилоят доир гардида, дар он фаъолони ҷомеаи шаҳрвандӣ, масъулони дастгоҳи идеологӣ ва маънавиёти шаҳру ноҳияҳо, донишҷӯёну сиёсатшиносон ва ҷавонони касбу кори гуногун ширкат варзиданд.

Чорабиниро муовини раиси вилояти Хатлон Фирӯза Шарифӣ ифтитоҳ бахшида, бо ёдоварӣ аз нақши Президенти Ҷумҳурии Тоҷикистон дар бунёди давлати соҳибистиқлоли Тоҷикистон ва хизматҳои шоёни Пешвои муаззами миллат дар таъмини сулҳу осоиштагӣ, барқарорсозии харобаҳои ҷанги шаҳрвандӣ ва таҳкиму ташаккули рукнҳои давлатдорӣ ибрози андеша намуд.

Зикр гардид, ки фаъолияти пурсамари сиёсии Сарвари давлат муҳтарам Эмомалӣ Раҳмон на танҳо барои сиёсатшиносону ҷавонони худогоҳи Тоҷикистон, балки барои ҷомеашиносон, сиёсатмадорону пажуҳишгарони кишварҳои гуногуни олам ҳамчун мактаби беназири сулҳовариву давлатсозӣ арзёбӣ мегардад.

- Иҷлосияи 16-уми Шурои Олии Ҷумҳурии Тоҷикистон, ки дар он аз ҷониби вакилони мардумӣ роҳбари ояндаи кишвари дар гирдоби ҳодисаҳои шаҳрвандӣ мондаро интихоб намуда буданд, Сарвари ҷавони мамлакат дар нахустин суханронии хеш ба мардуми азияткашида Паёми сулҳро ироа намуд. Ҳамин тавр, Иҷлосияи тақдирсоз сарчашмаи таҳкими қонуният ва барқарорсози ҳокимияти давлатӣ гардид, ки минбаъд санаи 6 ноябри соли 1994 ҷиҳати баргузории раъйпурсии умумихалқӣ дар кишвари соҳибистиқлоли Тоҷикистон заминаи қонунӣ фароҳам овард ва мардум якдилона нахустин Конститутсияи Ҷумҳурии Тоҷикистонро қабул намуданд.

Дар Конфронси илмӣ-амалӣ таҳти унвони “Нақши Пешвои миллат дар таҳкими Истиқлол ва нумӯи Тоҷикистон” декани факултети фалсафаи Донишгоҳи миллии Тоҷикистон Хуҷамурод Сафарализода, муовини сардори Раёсати Кумитаи амнияти миллии Ҷумҳурии Тоҷикистон дар вилояти Хатлон Фирдавс Холиқов, раиси КИ ҲХДТ дар вилояти Хатлон Саидзода Ҷамшед оид ба хизматҳои шоёни Президенти Ҷумҳурии Тоҷикистон муҳтарам Эмомалӣ Раҳмон ва нақши таърихиву тақдирсози Пешвои муаззами миллат дар бунёди ҷомеаи соҳибистиқлоли Тоҷикистон, таъмини сулҳу осоиштагӣ, наҷоти миллату давлат аз парокандагӣ ибрози андеша намуданд.

Зикр гардид, ки маҳз бо ҳидояту роҳнамоиҳои хирадмандонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тули 31 соли баъди Иҷлосияи сарнавиштсози миллат Тоҷикистон ба рушду тараққиёти беназир ноил гардида, дар тамоми соҳаҳои хоҷагии халқи мамлакат пешрафтҳои беназир мушоҳида мегардад.

Дар ин давраи муҳими миллату давлатсозӣ Ҷумҳурии Тоҷикистон бо сарварии Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон ҳамчун кишвари амну осоишта рушду пешрафтҳои бузург дошта, Сарвари давлат бо ташаббусҳои муҳим дар самти ҳалли мушкилоти глобалии сайёра миллату давлати моро миёни оламиён муаррифӣ менамояд.

Дар фарҷоми чорабинӣ шоир Амиршоҳи Хатлонӣ бо қироати порчаҳо аз достони “Ҷаласаи қисмат” хотири иштирокчиёнро болида гардонид.

Ҷамолиддин САЙФИДДИН

Шаҳри Бохтар