Озмуни ҷумҳуриявии «Тоҷикистон – Ватани азизи ман» ҷамъбаст гардид

  Шоми дирӯз дар Театри давлатии академии опера ва балети ба номи С. Айнӣ даври ҷамъбастии Озмуни «Тоҷикистон - Ватани азизи ман» баргузор гардид.

Чорабинӣ бо сухани ифтитоҳии муовини Сарвазири мамлакат Матлубахон Сатториён оғоз гардида, пас аз пешниҳоди барномаи фарҳангию фароғатӣ ғолибони озмун бо ҷоизаҳо сарфароз гардонда шуданд. Дар даври ниҳоии озмун 508 нафар довталабон аз рӯйи 5 номинатсия – «композиторӣ», «сарояндагӣ», «навозандагӣ», «санъати тасвирӣ» ва «дизайн» ширкат варзида, 118 нафар соҳиби ҷоиза гардид. Бояд гуфт, ки номинатсияҳои «санъати тасвирӣ» ва «дизайн» бори аввал баргузор шуданд.

Дар номинатсияи «сарояндагӣ» Хусрав Ҳабибов, дар номинатсияи «навозандагӣ» жанри анъанавӣ Фазлиддин Одинаев, номинатсияи «композиторӣ» Манучеҳр Бурҳонов, номиантсияи «санъати тасвирӣ» Муҳаммадҷон Ҳикматзода ва номиантсияи «дизайн» Наргис Саидова Шоҳҷоиза ба даст оварданд.

Тибқи муқаррароти низомнома 49 нафар омӯзгороне, ки шогирдони худро дар радабандии синнусолии аз 12 то 17-сола аз даври якум то даври сеюми озмун омода намуданд, бо мукофотҳои пулӣ қадр гардиданд.