Абдухалил Ғафурзода: Дар Академия 11 нафар донишҷӯи ятими кулл таҳсил мекунад

 Шумораи умумии донишҷӯён ва магистрантони Академияи идоракунии давлатии назди Президенти Ҷумҳурии Тоҷикистон 4864 нафарро ташкил медиҳанд. Аз ин теъдод 979 нафар ройгон ва 3885 нафар шартномавӣ таҳсил менамояд. Ин нуктаро ректори Академияи идоракунии давлатии назди Президенти Ҷумҳурии Тоҷикистон, доктори илмҳои ҳуқуқшиносӣ, профессор Абдухалил Ғафурзода зимни нишасти матбуотӣ ба хабарнигорон иттиллоъ дод.

Қайд гардид, ки дар Академия 11 нафар донишҷӯи ятими кулл, 48 нафар нимятим, 14 нафар маъюб ва 5 нафар камбизоат таҳсил менамоянд. Ба 26 нафар донишҷӯёни ятими кулл ва донишҷӯёни имконияташон маҳдуд стипендияи муқаррарӣ ва ҳармоҳа ба миқдори 300 сомонӣ барои хӯрокпулӣ ҷудо карда шуда, ройгон бо хобгоҳ таъмин карда мешаванд.