50 донишҷӯдухтар ба Мактаби «Сарварони ҷавон» ҷалб шуданд

  Дар раванди амалишавии Барномаи давлатии тарбия, интихоб ва ҷобаҷогузории кадрҳои роҳбарикунанда аз ҳисоби занону духтарони болаёқат барои солҳои 2023 – 2030 беш аз 50 донишҷӯдухтарони фаъолу лаёқатманди донишгоҳу донишкадаҳои олии кишвар ба курси 6-моҳаи Мактаби «Сарварони ҷавон» ҷалб гардида, 45 нафарашон соҳиби гувоҳнома шуданд. Дар ин бора раиси Кумитаи кор бо занон ва оилаи назди Ҳукумати Ҷумҳурии Тоҷикистон Ҳилолбӣ Қурбонзода зимни нишасти матбуотӣ, ки 9 августи соли ҷорӣ доир гардид, хабар дод.

Қайд карда шуд, ки Кумита барои ҳавасмандгардонии хизматчиёни давлатӣ Озмуни ҷумҳуриявии «Беҳтарин хизматчии давлатӣ аз ҳисоби занон»-ро роҳандозӣ намуд. Даври вилоятии озмун бо иштироки 19 нафар довталаб аз шаҳру ноҳияҳои ВМКБ дар шаҳри Хоруғ баргузор гардид, ки 6 нафар ғолибон ба даври ҷумҳуриявии озмун роҳхат гирифтанд.