Вазорати маориф ва илм: 4347 нафар хатмкардаи муассисаҳои таҳсилоти миёна ва олии касбӣ бо ҷойи кор таъмин гаштанд

  Бо мақсади таъмини муассисаҳои таълимии шаҳру ноҳияҳои ҷумҳурӣ бо омӯзгорони ҷавон моҳи майи соли ҷорӣ бо иштироки намояндагони вазорат ва хадамоти кадрии раёсати маорифи вилоятҳо ва шаҳру ноҳияҳои ҷумҳурӣ тақсимоти хатмкунандагони муассисаҳои таҳсилоти миёна, ибтидоӣ ва олии касбӣ гузаронда шуд. Дар ин бора вазири маориф ва илми Ҷумҳурии Тоҷикистон Раҳим Саидзода зимни нишасти матбуотии ин ниҳод ибрози назар кард.

Гуфта шуд, ки дар асоси тақсимот ба 4347 нафар хатмкардаи муассисаҳои таҳсилоти миёна ва олии касбӣ (3142 нафар дорои маълумоти олии касбӣ, аз ҷумла, 741 нафар тибқи квотаи Президенти Ҷумҳурии Тоҷикистон ва 1205 нафар дорои маълумоти миёнаи касбӣ) роҳхати Вазорати маориф ва илми Ҷумҳурии Тоҷикистон ҷиҳати ба ҷойи кор таъмин гардиданашон, дастрас гардид.