Бахшида ба ҷашни Истиқлоли давлатӣ дар шаҳри Душанбе барномаҳои фарҳангию фароғатӣ баргузор мегарданд

Ба ифтихори 31-солагии Истиқлоли давлатии Ҷумҳурии Тоҷикистон рӯзҳои 8 - 9 сентябр дар чор ноҳияи шаҳри Душанбе барномаҳои гуногуни фарҳангию ҳунарӣ, сайру гашти оммавӣ ва намоишҳои ҷолиб баргузор мегардад, хабар медиҳадл АМИТ «Ховар».

     9 сентябр аз соати 09.00 то 11.00 дар Боғи «Ирам» ҳунармандони Филармонияи давлатии Тоҷикистон ба номи А. Ҷӯраев ва Театри давлатии академии опера ва балети Тоҷикистон ба номи С. Айнӣ барномаи театрӣ ва суруду мусиқии дилангезро пешкаши сокинон ва меҳмонон мегардонанд. Дар ин рӯз дар Боғи фарҳангӣ-фароғатии «Кӯли ҷавонон» Иттиҳодияи давлатии гурӯҳҳои эҷодию консертии Вазорати фарҳанги кишвар барномаи ҷолиби фарҳангиро манзури сокинон менамояд. Ансамбли давлатии хизматнишондодаи рақсии «Лола» ва ансамбли «Сомон» дар майдончаи фарҳангии хиёбони Сино барномаи фарҳангӣ ва рақсҳои тоҷиконаро манзур мегардонанд. Ҳамчунин, дар ин рӯз Муассисаи давлатии сафарию ҳунарии «Базморо», Консерваторияи миллии Тоҷикистон ба номи Т. Сатторов ва Донишкадаи давлатии фарҳанг ва санъати Тоҷикистон ба номи М. Турсунзода дар Боғи фарҳангӣ-фароғатии «Фирдавсӣ»-и пойтахт барномаи ҷолибро пешниҳод менамоянд.

Ҳамчунин дар ин рӯз аз аз соати 15.00 то 17.00 дар Боғи «Ирам» Иттиҳодияи давлатии гурӯҳҳои эҷодию консертӣ, дар Боғи фарҳангию фароғатии «Кӯли ҷавонон» ҳунармандони Филармонияи давлатии Тоҷикистон ба номи А. Ҷӯраев ва Муассисаи давлатии сафарию ҳунарии «Базморо», Консерваторияи миллии Тоҷикистон ба номи Т. Сатторов ва Донишкадаи давлатии фарҳанг ва санъати Тоҷикистон ба номи М. Турсунзода дар Майдончаи фарҳангии хиёбони Сино, Ансамбли «Лола» ва ансамбли «Сомон» дар Боғи фарҳангӣ-фароғатии «Фирдавсӣ» бо барномаҳои ҷолиби идона хотири меҳмонону сокинони шаҳрро шод мегардонанд.

   Аз 9 то 11 сентябр ба истиқболи 31-солагии Истиқлолияти давлатии Ҷумҳурии Тоҷикистон барномаҳои фарҳангӣ-фароғатии сиркӣ пешниҳоди тамошобинон гардонда мешаванд. Ин барномаҳо барои шаҳрвандони синни гуногун равона гардида, дар онҳо бештар жанрҳои сиркӣ, аз ҷумла, гимнастика, акробатика, дрессура (ромкунандаи ҳайвонот), эквилибристика (мувозинатнигаҳдорӣ), клоунада (масхарабозӣ), жонглёр (саққобоз), атлетика (варзиш), фокус (чашмбандӣ) ва ғайра пешниҳод мегарданд.

       С. Ашӯрова