РӮЗИ БАЙНАЛМИЛАЛИИ ҲИФЗИ КӮДАКОН БОТАНТАНА ТАҶЛИЛ МЕГАРДАД

Ба муносибати Рӯзи байналмилалии ҳифзи кӯдакон Ррӯзи 1 июн, соати 14:00 дар «Боғи кӯдакон»-и пойтахт бо ибтикори мақомоти иҷроияи ҳокимияти давлатии шаҳри Душанбе барномаи  бошукӯҳи фарҳангию фароғатӣ таҳти унвони «Кӯдакон-дунёи моянд» доир мешавад, хабар медиҳад АМИТ «Ховар».

Дар чорабинӣ намоиши маҳсули эҷоди кӯдакону наврасони муассисаҳои таҳсилоти иловагии ноҳияҳои пойтахт ва шаҳри Душанбе таҳти унвони «Душанбе–шаҳри орзуҳо» ба тамошо  гузошта шуда, инчунин баргузории дигар бозиҳои шавқовар барои кӯдакон дар назар дошта шудааст.

Баъди тамошои намоиш дар амфитеатри «Боғи кӯдакон» барномаи фарҳангӣ доир гардида, ба ғолибон ва иштирокчиёни фаъоли озмуну мусобиқаҳои зеҳнию маърифатӣ ва варзишӣ ба муносибати Рӯзи байналмилалии ҳифзи кӯдакон диплому ифтихорнома ва туҳфаҳои хотиравӣ супорида мешаванд.

Инчунин бахшида ба Рӯзи байналмилалии ҳифзи кӯдакон дар муассисаҳои томактабии шаҳри Душанбе барномаҳои тарбиявию маърифатӣ роҳандозӣ шудаанд, ки то охири рӯз барои хотирмон таҷлил намудани ин рӯз манзури кӯдакон гардонида мешаванд.

           Дар Муассисаи давлатии «Осорхонаи миллӣ» низ Рӯзи кӯдакон бо баргузории барномаи фарҳангӣ-фароғатӣ таҷлил мегардад, ки дар доираи он кӯдаконро шакли зиндаи одамони «Асри санг», «Маликаи Саразм», «Кентавр», инчунин саволу ҷавобҳо, қироати шеър дар васфи Ватан - Модар ва чистонҳо интизоранд. Инчунин ба ғолибон шириниҳо туҳфа карда мешаванд. Барномаҳо ва тамошои онҳо ба ҳамаи қишрҳои ҷомеа, махсусан кӯдакон таъсири мусбат расонида, онҳоро болидарӯҳ ва хушҳол менамоянд.