ШАҲРВАНДОНИ ТОҶИКИСТОН ВА ӮЗБЕКИСТОН МЕТАВОНАНД ТО 10 РӮЗ БИДУНИ САБТИ НОМ ДАР КИШВАРИ ҲАМСОЯ БИМОНАНД

Парлумони Тоҷикистон ба Созишномаи байни ҳукуматҳои Тоҷикистон ва Узбекистон дар бораи сафарҳои мутақобилаи шаҳрвандон аз 9 марти соли 2018 тағйироту иловаҳо ба тасвиб расонд. Дафтари матбуоти парлумон хабар дод, ки рӯзи 30-уми марти соли ҷорӣ  дар Душанбе ҷаласаи навбатии иҷлосияи сеюми Маҷлиси намояндагони (палатаи поёнии парлумони) Тоҷикистон даъвати шашум баргузор шуд. Аз ҷумла, вакилони парлумон Протоколро дар бораи ворид намудани тағйиру иловаҳо ба Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Узбекистон дар бораи сафарҳои мутақобилаи шаҳрвандон аз 9 марти соли 2018 баррасӣ карданд.

Аз ҷумла, ба банди 3-и Созишномаи мазкур тағйирот ворид карда шудааст, ки тибқи он шаҳрвандони яке аз тарафҳо, ки ба қаламрави тарафи дигар ворид мешаванд, аз уҳдадории бақайдгирӣ ва бақайдгирии муваққатӣ дар мақомоти салоҳиятдори давлати иқомат ба муддати муайян озод карда мешаванд. (Аз лаҳзаи убури сарҳади давлатӣ ба муддати 10 рӯзи корӣ).

Пас аз баррасӣ вакилони Маҷлиси намояндагон ислоҳи созишномаи мазкурро ба тасвиб расониданд.

 Манбаъ: АИ «Авесто»