217 БИНОИ МУАССИСАИ ТАҲСИЛОТИ УМУМӢ БА ИСТИФОДА ДОДА ШУД

Соли 2021 тибқи маълумоти оморӣ дар қаламрави ҷумҳурӣ аз ҳисоби ҳамаи сарчашмаҳои маблағгузорӣ 217 бинои муассисаи таҳсилоти умумӣ ва бинои иловагӣ дар назди муассисаҳои таҳсилоти умумӣ барои 48281 ҷойи нишаст  бо маблағи 523 млн. 970 ҳазор сомонӣ сохта ба истифода дода шуд, иброз дошт дар нишасти матбуотӣ вазири Вазорати маориф ва илми ҷумҳурӣ Муҳаммадюсуф Имомзода, ки 3 феврали соли 2022 доир гардид.

Мувофиқи иттиллои ӯ 163 бинои муассисаи таълимӣ ва бинои иловагӣ дар назди муассисаҳои таълимӣ барои 33125 ҷойи нишаст бо маблағи 185 млн. 661 ҳазор сомонӣ аз ҳисоби соҳибкорон ва ба тариқи ҳашар сохта ба истифода дода шудааст.

Маълум гардид, ки дар давоми соли 2021 вобаста ба имкониятҳои молиявии вазорат ба миқдори 6476 ҷойи нишаст мизу курсии талабагӣ, 175 ҷуфт мизу курсии омӯзгорӣ, 206 тахтаи синфӣ, 71 адад ҷевони китоб, 15 адад мизу курсии компютерӣ, 27 ҷуфт мебели кабинети директор, 3 маҷмуъ кабинети фанни биология, 3 маҷмуъ кабинети фанни физика, 3 маҷмуъ кабинети фанни химия, 8 адад ҷевони либосмонӣ, 22 адад компютер ва 2 адад тахтаи электронӣ харидорӣ шуда, дастраси муассисаҳои таълимии ҷумҳурӣ гардонда шудааст.