ҲАҶМИ СОДИРОТИ ЭНЕРГИЯИ БАРҚ 911,6 МЛН. КВТ. СОАТ ЗИЁД ШУД

Айни замон дар асоси технологияи муосири (барномаи билингӣ) дар соҳа ҷоригардида, ирсоли СМС–паёмак ба муштариён оид ба маълумоти нишондиҳандаҳои ҳисобкунак, сарфи энергияи барқ, ҳисоби маблағи барқи истифодашуда, пардохти он ва бақия баъди сабти электронӣ ва ё баъди пардохти маблағ роҳандозӣ карда шуд, ки ҳадаф аз он шаффофият дар ҳисобу китоби дақиқи энергияи барқ ба ҳисоб меравад. Дар натиҷа сатҳи хизматрасонӣ ба муштариён баланд бардошта шуда, вазорат айни замон дар якҷоягӣ бо ҷамъиятҳои шабакаҳои интиқол ва тақсимоти барқ барои дар тамоми қаламрави кишвар ҷорӣ намудани системаҳои электронии идоракунии истифодаи энергияи барқро тавассути истифодаи технологияи муосир дар сатҳи зарурӣ ба роҳ мондааст. Дар ин бора санаи  31. 01. 2022, зимни нишасти матбуотӣ Вазири энергетика ва захираҳои оби Ҷумҳурии Тоҷикистон Далер Ҷумъа ба хабарнигорон иттилоъ дод.

Ба иттилои мавсуф истеҳсоли  неруи  барқ дар ҷумҳурӣ 20  млрд 624,6 млн. кВт-соатро ташкил дод, ки ин меъёр нисбат ба ҳамин давраи соли гузашта 853,8 млн кВт-соат зиёд буда, суръати афзоиш 104,3 фисад таъмин карда шуд.

Иттилло дода шуд, ки ҳаҷми содироти энергияи барқ дар умум 2 млрд. 439,2 млн. кВт. соатро ташкил дод, ки нисбат ба соли 2020  911,6 млн. кВт. соат зиёд буда, суръати афзоиш 159,6 % -ро ташкил додааст.