ОЗМУНИ ҶУМҲУРИЯВИИ «МУРАББИИ СОЛ – 2021» ОҒОЗ ШУД

11-уми январ дар маҷлисгоҳ Вазорати маориф ва илми Ҷумҳурии Тоҷикистон Озмуни ҷумҳуриявии “Мураббии соли Тоҷикистон - 2021” оғоз гардид, ки дар маросими ифтитоҳии он вазири маориф ва илм Муҳаммадюсуф Имомзода, муовини вазир, сардорони раёсату шуъба ва роҳбарони муассисаҳои тобеи вазорат, намояндагони раёсат ва шуъбаҳои маорифи вилоят ва шаҳру ноҳияҳо ва довталабони озмун иштирок намуданд.

Вазорати маориф ва илми Ҷумҳурии Тоҷикистон ҳамасола дар такя ба низомномаи «Озмуни мураббии соли Тоҷикистон» даври ниҳоии озмуни мазкурро доир менамояд. Дар озмуни имсола низ 5 довталаб аз Вилояти Мухтори Кӯҳистони Бадахшон, вилоятҳои Суғду Хатлон, ноҳияҳои тобеи ҷумҳурӣ ва шаҳри Душанбе ширкат варзида, маҳорату малакаи корбарӣ ва дониши педагогии худро нишон медиҳанд.

Озмуни имсола дар доираи ҷашни 30-солагии Истиқлоли давлатӣ дар шаҳру ноҳияҳо ва вилоятҳо ҷамъбаст гардида, беҳтарин довталабон ба даври ниҳоӣ роҳ ёфтанд.

Дар даври ниҳоӣ Гулру Гулбекова - мураббии Маркази инкишофи барвақтии кӯдаки Хазинаи Оғохони шаҳри Хоруғ, Мунира Ризоева -мураббии муассисаи томактабии №24-и шаҳри Бохтар, Тахмина Абдуалиева мураббии муассисаи томактабии № 23-и шаҳри Хуҷанд, Фирӯза Ғаниева - мураббии муассисаи томактабии № 64-и шаҳри Душанбе, Маҳбуба Пӯлодова - мураббии муассисаи томактабии № 1-и шаҳри Турсунзода иштирок намуда, тибқи шартҳои пешбининамудаи низомномаи озмун ҳунару маҳорати худро нишон медиҳанд.

Озмун рӯзҳои 11 - 13-уми январ дар муассисаи таҳсилоти томактабии № 149-и ноҳияи Исмоили Сомонӣ идома ёфта, маросими ҷамъбастии он дар Вазорати маориф ва илми ҷумҳурӣ баргузор мегардад.