ҲАБСИ НАЗОРАТЧИИ МИКРОАВТОБУС БАРОИ ДАШНОМҲОИ ҚАБЕҲ БА ЗАНИ МУСОФИР

Новобаста аз чораҳои андешидашудаи мақомоти милитсияи шаҳри Душанбе ҷиҳати банизомдарорӣ ва аз байн бурдани дағалрафториву кирдорҳои зиддиҳуқуқии ронандагону назоратчиёни нақлиёти мусофиркашони ҷамъиятӣ, мутаассифона, мусофирони зиёде аз бадрафториву тарзи нодурусти хизматрасонии чунин ронандагону назоратчиён ба мақомоти милитсияи пойтахт шикоят мекунанд.
         Аз ҷумла, санаи 19 декабри соли ҷорӣ дар шабакаҳои иҷтимоӣ наворе нашр гардид, ки дар он муноқишаи лафзӣ ва дашному ҳақоратҳои қабеҳи як нафар ҷавон - пулчинаки хатсайри № 25 нисбат ба зани мусофир, сокини шаҳри Душанбе инъикос ёфтааст. Тавре аз навор бармояд, зимни қарордошти зан бо кӯдакони ноболиғаш дар дохили микроавтобус байни ӯ ва пулчинак нофаҳмӣ ба вуҷуд омада, дар натиҷа байни ҳарду муноқишаи лафзӣ сурат мегирад. Сипас, ҷавон занро дар ҳузури фарзандони ноболиғаш ва дигар мусофирон мавриди дашному ҳақоратҳои ғайриахлоқӣ қарор медиҳад.
  Дар зимн шаҳрвандон аз Раёсати ВКД дар шаҳри Душанбе дархост намуданд, ки нисбат ба шахси дар навор инъикосёфта чораҳои дахлдори қонунӣ андешида шавад.

Дар доираи санҷиш муайян карда шуд, ки пулчинаки автомашинаи мазкур шаҳрванд Раҳматуллоев Кароматулло, сокини шаҳри Душанбе буда, аз амали содирнамуда ва аз дашному ҳақоратҳои дағалаш изҳори пушаймонӣ намуд.
 

Бо назардошти ҳолати мазкур нисбати Раҳматуллоев К. тибқи талаботи моддаи 460 (майдаавбошӣ) Кодекси ҳуқуқвайронкунии маъмурии Ҷумҳурии Тоҷикистон протоколи ҳуқуқвайронкунии маъмурӣ тартиб дода шуда, дар асоси Қарори Суд нисбташ ҷазо дар намуди ҳабси маъмурӣ ба муҳлати 5 шабонарӯз таъин карда шуд.

Манбаъ: Маркази матбуоти Раёсати ВКД дар ш. Душанбе