ДАР МУСОБИҚАИ ИНТИХОБИИ ОЛИМПИИ ОСИЁ ЧАҲОР ВАРЗИШГАРИ ТОҶИК ШИРКАТ МЕВАРЗАНД

21 - 22 май дар шаҳри Аммони Урдун Мусобиқаи интихобии олимпии Осиё оид ба таэквондо баргузор мешавад. Дастаи мунтахаби Тоҷикистон оид ба таэквондо дар ҳайати 4 нафар варзишгар ҷиҳати иштирок дар ин мусобиқа ба шаҳри Аммони Урдун сафарбар гардид, иттилоъ медиҳад АМИТ «Ховар».

Барои ба даст овардани роҳхат ба Бозиҳои олимпии Токио-2020 аъзои дастаи мунтахаби Тоҷикистон – Муҳаммадҷон Суннатов (-68кг), Хуррам Меҳтаршоев (-80кг) миёни мардон, Муниса Ойматова (-49кг), Моҳру Ҳалимова (-67кг) миёни бонувон талош мекунанд. Онҳоро дар ин сафар мураббиён Исломиддин Фозилов, Шамсулло Қодиров ва Чонг Чон Фи ҳамроҳӣ мекунанд.

Варзишгароне, ки ҷойҳои якуму дуюмро сазовор мешаванд, ҳуқуқи иштирок дар Бозиҳои олимпии Токиоро пайдо мекунанд. Боиси тазаккур аст, ки Муниса Ойматова ва Моҳру Ҳалимова аз дастгирии молиявии Кумитаи миллии олимпии Тоҷикистон бархурдор буда, барои ба даст овардани роҳхати олимпӣ талош хоҳанд кард.