ЧАРХАИ ДУЮМИ НБО «РОҒУН» БА КОР ДАРОМАД

9 сентябри соли равон чархаи дуюми Нерӯгоҳи барқи обии “Роғун” бо иштироки Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба кори худ оғоз намуд.

Сарвари давлат дар маҳалли сохтмон бо ҷараёни корҳо шинос гардида, сипас аз қисмати сарбанди нерӯгоҳ дидан намуданд. Дар толори агрегатҳо Президенти мамлакат муҳтарам Эмомалӣ Раҳмон дар вазъияти тантанавӣ чархаи дуюми Нерӯгоҳи барқи обии “Роғун”-ро ба кор дароварданд.

Баъди ба истифода додани чарха Президенти мамлакат муҳтарам Эмомалӣ Раҳмон дар ҷамомади бошукуҳи идона бо иштироки сохтмончиён, меҳмонони дохилу хориҷ суханронӣ намуда, кулли мардуми кишварро бо ин рӯзи муқаддас - Истиқлолияти давлатӣ ва ба фаъолият оғоз кардани чархаи дуюми НБО “Роғун” табрику таҳният гуфтанд.

Рафти чорабинии таърихиро 140 рӯзноманигори дохилу хориҷ дар шабакаҳои гуногуни телевизиониву радиоӣ ва матбуоту агентиҳои хабарӣ инъикос намуданд.

Ёдрас мешавем, ки НБО “Роғун” пуриқтидортарин иншооти силсилаи нерӯгоҳҳои рӯди Вахш, аз 6 агрегат иборат буда, тавоноии ҳар кадоми онҳо 600 мегаВаттро ташкил медиҳад. Дар сурати пурра ба фаъолият шуруъ кардани НБО “Роғун” бо иқтидори 3600 мегаВатт он калонтарин нерӯгоҳи барқи обӣ дар минтақа хоҳад буд.