САНГВОР

Дар ноҳия 60 муассисаи таълимӣ, аз ҷумла: 20 муассисаи таҳсилоти ибтидоӣ, 10 муассисаи таҳсилоти асосӣ, 28 муассисаи таҳсилоти миёнаи умумӣ, 1 интернати ҷумҳуриявӣ барои кӯдакони ятим ва 1 интернати наздимактабӣ фаъолият доранд. Ҷамъ дар ин муассисаҳо 5500 ҷойи нишаст мавҷуд мебошад. Дар ҳама намуди муассисаҳои таълимӣ 5097 нафар хонанда, аз ҷумла 2431 нафар духтар ба таълиму тарбия фаро гирифта шудааст. Ба таълиму тарбияи насли наврас 556 нафар омӯзгор (186 нафар бонувон) шуғл меварзад.

Маҳз замони соҳибистиқлолии кишвар ноҳия соҳиби 1 беморхонаи марказӣ, ду беморхонаи минтақавӣ, як маркази саломатии ноҳиявӣ, чор маркази саломатии деҳот, 22 бунгоҳи тиббӣ, маркази эмтаъминкунӣ, маркази мубориза бар зидди бемории сил, маркази ташаккули тарзи ҳаёти солим ва маркази солимии репродуктивӣ ва танзими оила гардид.

Ноҳияи Сангвор дорои мактаби бузурги варзишӣ буда, дар он 11 нафар мураббӣ, аз ҷумла 6 нафар бо маълумоти олӣ ва 5 нафар бо маълумоти миёнаи махсус ба таълими варзишгарон машғуланд. Дар муассисаи мазкур ва ҷамоатҳои деҳот 27 гурӯҳ аз рӯи 6 намуди варзиш тамрин менамояд.

Ҳамчунин, дар ноҳия хонаи фарҳанг фаъолият менамояд, ки дар назди он маҳфили «Ҳаваскорон» ташкил карда шуда, ҷавонон ва наврасоне, ки истеъдод ва шавқу ҳавас нисбат ба ҳунар доранд, ҷалб гардидаанд.

Занони қобили меҳнат 5 ҳазору 812 нафарро ташкил дода, 21 нафар дар вазифаҳои роҳбарикунанда фаъолият менамояд. Соли ҷорӣ аз ҷониби бахши кор бо занон ва оила, дар ҷамоатҳои деҳот фестивали «Чакомаи гесӯ» ва озмунҳои «Кадбонуи беҳтарин», «Сад ранги чакан» доир шуданд.