«БОНУВОНИ ТОҶИКИСТОН» - ПУРХОНАНДАТАРИН МАҶАЛЛАИ КИШВАР

Аз рӯи натиҷаҳои назарсанҷие, ки Маркази тадқиқоти сотсиологии «Зеркало» барои ТҶ «Машварати расонавӣ» гузаронид, дар соли 2019 низ Маҷаллаи “Бонувони Тоҷикистон” мисли соли қаблӣ чун пурхонандатарин маҷаллаи кишвар шинохта шуд.

Муаррифии ин назарчанҷӣ 7 июни соли ҷорӣ дар маҷлисгоҳи Кохи афсарони шаҳри Душанбе дар ҳузури намояндагони Вазорати фарҳанги Ҷумҳурии Тоҷикистон, Сафорати ИМА дар Ҷумҳурии Тоҷикистон, намояндагону мутахассисони соҳа баргузор гардид.

Лоиҳаи Ҳисоботи тадқиқотии «Афзалиятҳои расонавии аҳолии Ҷумҳурии Тоҷикистон: телевизион, радио, нашрияҳои чопӣ, сомонаҳо, шабакаҳои иҷтимоӣ ва месенҷерҳо»-и ТҶ «Машварати расонавӣ» дар ҳамкорӣ бо Вазорати фарҳанги Ҷумҳурии Тоҷикистон, Маркази тадқиқотии сотсиологии «Зеркало» ва дастгирии молиявии Сафорати ИМА дар Ҷумҳурии Тоҷикистон амалӣ гардидааст.

Қайд гардид, ки тадқиқоти мазкур аз ҷониби МТС «Зеркало» моҳҳои январ – феврали соли 2019 дар байни 2446 нафар сокинони аз 18 сола болои кишвар аз минтақаҳои Душанбе, Хатлон, Суғд, ВМКБ ва шаҳру ноҳияҳои тобеъи ҷумҳурӣ гузаронида шудааст. Чунин назарсанҷӣ соли дуюм аст, ки аз ҷониби МТС «Зеркало» амалӣ мегардад ва соли гузашта низ маҷаллаи «Бонувони Тоҷикистон» пурхонандатарин маҷаллаи кишвар эълон гардида буд.

Дар бахши рӯзномаҳо нашрияи расмии «Ҷумҳурият» ва бахши радиову телевизион Телевизиони Тоҷикистон ва Радиои Тоҷикистон сазовори ҷои аввал гардиданд.