МАОШ ВА НАФАҚАҲО ЗИЁД МЕШАВАНД

Муовини директори агентии мазкур Назокат Одиназода оид ба фаъолияти ин ниҳод ба хабарнигорони ВАО иттилоот пешкаш намуда, аз ҷумла қайд кард, ки тибқи дастуру супоришҳои Ҳукумати ҷумҳурӣ аз моҳи сентябри соли ҷорӣ то 15 фоиз зиёдшавии ҳаҷми маоши кормандони соҳаҳои буҷетӣ ва ҳама намуди нафақаҳои шаҳрвандони кишвар дар назар аст.

Марбут ба синни нафақа қайд гардид, ки дар Тоҷикистон мардҳо аз синни 63 ва занон аз 58 ҳуқуқи ба нафақа баромаданро доранд. Заноне, ки 5 ва ё зиёда аз ин фарзанд доранду собиқаи 20-солаи корӣ, имкон доранд аз синни 53-солагӣ ба нафақа бароянд. Дар дигар ҳолатҳо новобаста аз шумори фарзандон заноне, ки собиқаи корӣ надоранд, дар синни 58 ҳуқуқ ба гирифтани нафақапулиро пайдо мекунанд.