Вазири фарҳанги ҷумҳурӣ Шамсиддин Орумбеков кормандони воситаҳои ахбори оммаро ба идашон табрик намуда аз роҳи тайкардаи матбуоти тоҷик мухтасар ёдовар шуд ва ба чанде аз идораҳои чопӣ ва рӯзноманигорони алоҳида диплому туҳфаҳои хотиравии вазоратро такдим намуд. Ҳамчунин, муовини аввали вазир Маҳмадсаид Пиров, муовини директори Агентии назорати давлатии молиявӣ ва мубориза бо коррупсия М.Бандишоев ва раиси иттифоқи журналистони Тоҷикистон Акбаралӣ Сатторов ба  ғолибони озмуни эълоншуда дар мавзӯи коррупсия диплому мукофотҳои пулӣ ва хотиравӣ  супориданд. Дар  чорабинии матбуотчиён аҳли нишаст мукофоти аз ҳама асосӣ - ҷоизаи ба номи устод Лоҳутиро интизор буданд,ки  онро кадом журналистон соҳибӣ мекунанд. Ва дар охир ин ҷоиза ҳам соҳибони худро ёфт. Дар боби маводи таҳлилии матбуот ба Гул Шарифов, намояндаи нашрияи «Чашмаи ҳаёт» ва мухбири рӯзномаи «Садои мардум» Ҳусейни Назрулло , барои барнома ва очеркҳои радиою  телевизионӣ ба Ғайратшоҳи Аҳмадзод ва Моҳсафар Яҳёева, ба корманди радио Алихон Зарифӣ ва барои асарҳои илмию публисистӣ дар соҳаи журналистика ба номзади илм Мирзоалӣ Ҷӯраев зери кафкӯбиҳои аҳли толор  ҷоизаҳои ба номи Лоҳутӣ супорида шуд.