ЛАҒЖИШИ КӮҲПОРАҲО РОҲИ ВАШАНГРО БАСТ

Ба гуфти манбаъ деҳаи Вашанг аз мавзеъҳои аз ҷиҳати экологӣ хатарнок арзёбӣ гардида, дар даҳсоли охир ин чаҳорумин ҳодисаи лағжиши кӯҳпораҳо мебошад, ки роҳи  мошингарди ҳудуди деҳаи Вашангро хароб мекунад. Тибқи иттилои манбаъ аз фаромадани сангпораҳо қисми  роҳи мошингард ва қитъаҳои заминҳои хоҷагиҳо хисорот дидаанд. Айни замон барои тоза кардани ин роҳ, ки маркази ноҳияро ба Ҷамоати деҳоти Урметан мепайвандад техникаи ёрирасон сафарбар карда шудааст.

Қаблан баъди лағжиши кӯҳпораҳо дар ин мавзеъ ҳудуди 150 оила ба ноҳияҳои Истаравшану Ғончӣ кӯчонида шуд. Ҳамчунин барои ба мавзеъҳои бехатари ноҳияи Зафарабод кӯчонидани 140 оилаи деҳаи Вашанг омодагӣ мебинанд. Ба гуфти Турақул Шодмонқулов, айни ҳол дар деҳаи Вашанг 1201 нафар аҳолӣ сукунат дорад.