МУЛОҚОТИ САРДОРИ ДАВЛАТ БО ЗИЁИЁН

Нахуст Эмомалӣ Раҳмон бо ёдоварӣ аз арзишҳои волои наврӯзӣ, ин ҷашни бостонию пурифтихори тоҷикон, ки имрӯз ҷаҳонӣ гардидааст, аҳли толор, мардуми ҷумҳурӣ ва ҳамаи тоҷикони ҷаҳонро бо фаро расидани Наврӯзи хуҷастапай табрику таҳният гуфт.

Чунонки таъкид гардид, “ҳадаф аз мулоқотҳо бо зиёиён муҳайё кардани шароити мусоид барои эҷодкорони кишвар – аҳли адаб, илму маориф ва фарҳанг дар бобати тадқиқу эҷодкорӣ ва кашфиёту ихтирооти техникиву технологии муосир мебошад”.

Бо тазаккур аз равандҳои ҷаҳонишавӣ, хатарҳои муосир ба асолати миллӣ ва амну суботи кишвар, минтақа ва ҷаҳон Сарвари давлат таъкид намуд, ки «зиёиён ва равшанфикрон бояд нерӯи раҳнамо ва ҳидоятгари ҷомеа бошанд». Бино ба таъкидҳои Президенти кишвар “зиёиёни ҷумҳурӣ дар кори пешгирӣ аз падидаҳои ифротгароӣ, ки дар ҷомеаи Тоҷикистон низ зуҳураш ба назар мерасад, бояд пешсафу таъсиргузор бошанд, то ки баъзе ҷавонону наврасони камогоҳи мо ба гумроҳӣ кашида нашаванд”.