ҶАЛБИ ЗАНОН БА СОҲАИ ХИЗМАТИ ДАВЛАТӢ ҚАНОАТБАХШ НЕСТ

                 Дар гузориши Гурез Қосимов, муовини сардори Раёсат ҳамаи самтҳои фаъолияти ин ниҳод дақиқ мавриди баррасӣ қарор гирифт. Аз ҷумла, фаъолияти кормандони Раёсат оид ба санҷиши иҷрои Барномаи татбиқи консепсияи сиёсати давлатии кадрҳои ҶТ барои солҳои 2009-2016, иҷрои қонунгузории хизмати давлатӣ, риояи талаботи тахассусӣ ҳангоми қабул ба хизмати давлатӣ, Кодекси одоби хизматчии давлатии ҶТ, ҷалби занон ба хизмати давлатӣ, пешниҳоди дархости мақоми давлатӣ барои таҳсили хизматчиёни давлатӣ, ташкили курсҳои кӯтоҳмуддати омӯзиши забонҳо ва татбиқи кафолатҳои  иҷтимоӣ нисбати хизматчиёни давлати дар як қатор вазорату кумита ва ташкилотҳои ҷумҳуриявӣ, ҳамчунин вилояту шаҳру ноҳияҳо  қайд гардид.

                 Тавре Г.Қосимов зикр кард,  санҷишҳои гузаронидашуда ошкор намудаанд, ки ҳолатҳои ҳанӯз ҳам бе озмун ба кор ҷалб кардани хизматчиёни давлатӣ, риоя нашудани тартиби бастани шартномаи меҳнатӣ, дер аз мӯҳлати муайяншуда гузаронида шудани аттестатсияҳо, кам аҳамият додан ба таҳсили хизматчиёни давлатӣ, ҳамчунин оид ба захираи кадрҳо, баррасии муроҷиати шаҳрвандон ва ғайра дар баъзе аз вазорату идораҳои давлатӣ ва мақомоти маҳаллӣ ҷой доранд.

                Дар хусуси  ҷалби занон ба соҳаи хизмати давлатӣ таъкид гашт, ки ҳанӯз ҳам дар ин масъала ба саҳланкориву камфаъолиятӣ роҳ дода мешавад ва теъдоди бонувон дар рӯйихати кадрҳои захиравӣ хеле кам арзёбӣ шуд.