МАЪРИФАТИ ҲУҚУҚӢ

Ба гуфтаи Савсан Шарипова дар назди бахшҳои кор бо занон ва оила фаъолияти ҳуқуқшиносон аз рӯи реҷаи корбайъ ба роҳ монда шудааст. Аммо бо дастури раиси ноҳияи Бохтар Абдуаллим Исмоилов шурӯъ аз соли 2012-ум дар назди бахши кор бо занон ва оилаи ноҳияи Бохтар як воҳиди кори ҳуқуқшиноси бонувон таъсис дода мешавад.

Бинобар гуфтаи мудири бахши кор бо занон ва оилаи ноҳияи Бохтар ҳуқуқшиноси бахши мазкур натанҳо аз ҳуқуқҳои бонувон муҳофизат мекунад, балки минбаъд дар баланд бардоштани маърифати ҳуқуқии бонувону духтарҷавонон чорабиниҳои фаҳмондадиҳиро ба роҳ хоҳад монд.

Тибқи иттилои ба дастомада дар ноҳияи Бохтар 101 224 нафар бонувон истиқомат мекунанд, ки аз ин теъдод ҳамагӣ 180 нафар дар вазифаҳои роҳбарикунанда фаъолият доранд. Аз ҷумла, муовини раиси ноҳия ва 3 нафар раисони ҷамоати деҳоти ноҳия, 11 директорони мактабҳо ва 63 нафар раисони хоҷагиҳои хурди деҳқонӣ аз ҳисоби бонувон мебошанд.

Дар 11 моҳи соли ҷорӣ дар ҳудуди ноҳия 149 ҳолати аз ҳампошхӯрии оилаҳо ба қайд гирифта шудааст. Иддае аз бонувони фаъоли ноҳия иброз медоранд: «Вақти он омадааст, ки кодекси оила такмил дода шавад. Зеро бидуни тақвият додани қонунҳои мавҷуда дар кодекси оила пешгирӣ аз ҷудошавии оилаҳо имконнопазир аст. Бояд қонунҳое ҷорӣ карда шавад, ки ҷавонон, ба хусус ҷавонмардон ҷудошавӣ аз ҳамсарро амали сода напиндоранд».