МУШКИЛИ МУҲОҶИРОН ОСОН ҲАЛ МЕШАВАД

Вохӯрӣ рӯзҳои 19-20 сентябри соли ҷорӣ дар маҷлисгоҳи меҳмонхонаи «Тоҷикистон» бо ширкати намояндагони Хадамоти муҳоҷират, вазорату идораҳо, мақомоти маҳаллии иҷроияи ҳокимияти давлатии пойтахт ва ноҳияҳои он, ҳамчунин созмонҳои байналмилалӣ, ҷамъиятӣ ва ғайриҳукуматӣ баргузор шуд. Ҳайати Раёсати Хадамоти Федералии Муҳоҷирати Русия (РХФМ) дар шаҳри Санкт – Петербург ва вилояти Ленинград бо роҳбарии сардори раёсат Елена Дунаева ва намояндагии корхонаи федералии воҳиди давлатии «Паспортно – визовый сервис» - и РХФМ бо сардории директори намояндагӣ Елена Корлёва барои боздиди расмии чоррӯза ба шаҳри Душанбе ташриф овардаанд. 

Тибқи маълумоти расмӣ  дар ҳудуди шаҳри Санкт – Петербург ва вилояти Ленинград 80 ҳазор нафар шаҳрвандони Тоҷикистон зиндагӣ мекунанд.

Мувофиқи суханони роҳбари РХФМ, имрӯз дар шимоли мамлакат ба манзури хизматрасонии самарабахш ба соҳаи муҳоҷирати меҳнатии шаҳрвандони хориҷӣ дар шаҳри Санкт – Петербург ва вилояти Ленинград ва барои онҳо фароҳам овардани шароити дилхоҳи ба расмият даровардани ҳуҷҷатҳо «Маркази ягонаи муҳоҷират» таъсис ёфтааст. Маркази мазкур ҳамчунин дар амри ҷалби муташаккилона ва истифодаи қувваи кории хориҷӣ аз рӯи ихтисосу касб мадад мерасонад. Муҳоҷири меҳнатие, ки хоҳиши тавассути ин марказ ба кор дохил шуданро дошта бошад, барои ба расмият даровардани ҳуҷҷатҳои зарурӣ бояд каме зиёдтар аз 10 ҳазор рубли русиягӣ пардозад.