Боздиди бонувони тоҷик аз Аврупо

Ҳашт нафар намояндагони ҳизбҳои сиёсии Тоҷикистон, ки ба наздикӣ аз сафари Франкфурти Олмон ва Варшаваи Полша баргаштаанд, таассуроти худро аз ин сафар дар нишаст изҳор намуданд. Мақсади сафар шиносоӣ бо масъалаҳои иштироки занон дар ҳаёти сиёсӣ ва раванди демокротикунонӣ арзёбӣ шуд.

        Тавре иштирокчиён зикр намуданд, онҳо бо намояндагони ҳизби Сабз, ташкилоти рушди Аврупо ва муовини раиси шаҳри Франкфурти Олмон воҳӯрӣ анҷом доданд.

            Ҳамчунин гурӯҳи мазкур дар якчанд семинару вохӯриҳои судманд ширкат варзида, аз вазъи иштироки занон дар ҳаёти сиёсии ин кишварҳо огоҳ гаштаанд.

            Дилбар Самадова, раиси ҳизби  сотсиал-демократии Тоҷикистон дар вилояти Суғд таасуроташро оид ба ин сафар чунин иброз намуд: «Ин сафари чандрӯза  барои иштироки фаъоли занҳо дар ҳаёти сиёсии кишвар такони ҷиддие буд, ки бовар дорам барои оянда саҳми арзанда мегузорад».

            Дилбар Солеҳова, раиси ҳизби сотсиалистии Тоҷикистон дар вилояти Хатлон аз зиёд будани сафи занон дар парлумони ин кишварҳо ҳарф зада, аз масъулиятшиносиву ҷасурии онҳо изҳори қаноатмандӣ намуд.  

             «Мо аз Созмони Амният ва Ҳамкорӣ дар Аврупо дархост намудем, ки чунин вохӯриҳо зуд-зуд, ақаллан  моҳе як маротиба гузаронида гарданд», - гуфт, Дилбар Солеҳова.

            Зарагул Мирасанова, намояндаи ҳизби коммунистии Тоҷикистон назари худро нисбати баргузории ин гуна нишастҳо чунин иброз намуд: «Максади мо аз ташкил намудани ин гуна нишастҳо ин аст, ки шумораи занони фаъолро дар парлумон зиёд бубинем. Бо мақсади афзун намудани шумораи занон дар ҳизбҳо аз ҳисоби ҷавондухтарон мо тасмим гирифтем, ки дар оянда дар дигар манотиқи Тоҷикистон низ чунин мизҳои мудаввар баргузор намоем».

            Бояд қайд намуд, ки масъалаи сафар ба давлатҳои Аврупо моҳи декабри соли 2010, дар як семинаре, ки бо ташаббуси САҲА дар Душанбе баргузор шуда буд, аз ҷониби намояндагони ҳизбҳои сиёсии Тоҷикистон ба миён гузошта шуда буд. Ин пешниҳодро дар дафтари САҲА пазируфта, аз 13 то 21 май як гурӯҳи занони сиёсатмадорро ба хотири шиносоӣ ба давлатҳо Аврупо сафарбар намуданд.