ҲУҶУМИ ШАҒОЛҲОИ ДЕВОНА БА ОДАМОН

Ҳусейнбой Ҳисориев сардори озмоишгоҳи бойтории вилояти Хатлон зимни сӯҳбат  иброз дошт, ки азбаски ҳайвонот шабона ҳуҷум кардаанд, одамон каме дар таҳлука афтодаанд. Шубҳае нест, ки ҳар инсон барои таъсирбахш нақл кардани як ҳодиса барои нафари дигар аз худ чизе илова мекунад. Дар асл 4 сар ваҳшие, ки ба  мардуми дар хоб буда дарафтодаанд, шағол мебошанд. Ба гуфти ӯ сокинони деҳаи Сариқамиши ноҳияи Ёвон як сар аз ваҳшиҳоро дастгир карда, сарашро барои ташхис ба  маркази миллии бойтории Тоҷикистон фиристодаанд. Азбаски масоҳати роҳ аз Ёвон то Душанбе ҳамагӣ 40-50 километр асту аз Ёвон то маркази Хатлон 100 километрро ташкил медиҳад, мо барои ҳарҷи тезтар ташхис кардан ва ба табобат фаро гирифтани осебдидагон ташхисро дар Душанбе гузаронидем. Дар натиҷаи ташхис ошкор шудааст, ки шағолон гирифтори бемории ҳурӣ мебошанд.

Шералӣ Бузмаков сардори раёсати тандурустии вилояти Хатлон иброз медорад, ки шаби аввали рух додани ин ҳодиса осебдидагон дар беморхонаи марказии ноҳия хобонида шудаанд. Ба гуфти сардухтури Хатлон барои пешгирии осебдидагони Ёвон аз бемории ҳурӣ доруи «имунагмоглобин» аз Русия дастрас шудааст. Арзиши як «ампула»-и он беш аз 400 сомониро ташкил медиҳад.

                                                        Ҷ. Сайфиддинов