Бадахшон: худкушӣ нест!

Сумангул Тағоева - Раиси Кумитаи кор бо занон ва оилаи назди Ҳукумати Ҷумҳурии Тоҷикистон барои хабарнигорони расонаҳои дохиливу хориҷӣ аз фаъолияти семоҳаи ниҳоди мазкур ҳисобот пешниҳод кард.

Смангул Тағоева дар баробари дастовардҳо, аз мушкилоти мавҷуда низ дар байни занон ҳарф зад.

Раиси кумита аз зиёд шудани падидаи худкушӣ дар байни занон изҳори норозигӣ карда гуфт: «Аз 134 нафаре, ки дар семоҳаи авали соли ҷорӣ даст ба худкушиву худсӯзӣ задаанд, 61 нафарашонро занҳо ташкил медиҳанд. Дар байни онҳо 10 нафар духтарони ҷавон низ  ба қайд гирифта шудаанд. Қисми зиёди ин арқом ба вилояти Суғд тааллуқ дорад, ки ин боиси таассуф аст. Дар вилояти Бадахшон дар се моҳи ҳисоботӣ ягон нафар даст ба худкушӣ назадааст, ки ин моро хурсанд мекунад».

Аз рӯи иттилои манбаъ, дар се моҳ, 24452 оилаи ҷавон бунёд гардида, 1742 оила вайрон шудааст.

Дар семоҳаи авали соли 2011 - 46 нафар зан бо нишонаҳои бемории ВИЧ-СПИД ба қайд гирифта шудаанд. Дар ҳамин давра 303 нафар занҳо гирифтори нашъаву нашъамандӣ гардидаанд.