РӮЗИ МОҲИХӮРӢ?

Аз рӯйи нақшаи Вазорати кишоварзӣ соли 2011 дар кишти баҳорӣ дар масоҳати 112798 га замин зироатҳои ғалладона ва 232480 га замин зироатҳои техникӣ ба нақша гирифта шудааст, ки нисбат ба соли гузашта 12160 га зиёд буда, иҷроиши нақша дар арафаи анҷомёбӣ қарор дорад.

Мувофиқи иттилои расмии вазорат, имсол ҳам соҳаҳои чорводорӣ, занбӯрпарварӣ, моҳипарварӣ ҳамчун соҳаҳои афзалиятнок маънидод мешаванд, ки барои пешрафт ва густариши ин соҳаҳо Вазорати кишоварзӣ диққати махсус зоҳир мекунад.        

Дар хусуси гаронии нархи гӯшти парранда ва тухм дар бозорҳои ҷумҳурӣ, С. Исроилов гуфт, ки имрӯз дар миқёси ҷумҳурӣ 30 адад корхонаҳои паррандапарварӣ фаъолият мебаранд. Мувофиқи Агентии давлатии омор дар корхонаҳо ва хоҷагии деҳқонии паррандапарварӣ то 1.04.2011 1428094 сар парранда парвариш карда шуда, 39654 ҳазор дона тухм истеҳсол карда шудааст, ки нисбат ба ҳамин давраи соли гузашта саршумори парранда 170352 сар ва истеҳсоли тухм 11340 ҳазор дона зиёд гардидааст.

«Нархи ҳар як дона тухм дар корхонаҳои истеҳсолӣ 39-40 дирамӣ муқаррар карда шудааст. Миёнарав ва фурӯшанда бошанд, ин нархро қариб як баробари дигар боло мебароранд, ҳол он ки заҳмат ва харҷи асосиро истеҳсолкунанда бар зима дорад. Бо сабаби гаронии нархи гӯшти парранда дар бозорҳо он ба фурӯш намеравад, ки дар натиҷа истеҳсолкунанда зарар мебинад. Гӯшти моҳӣ низ имрӯз камталаб аст. Бо назардошти фоиданок будани гӯшти моҳӣ дар оянда мо мехоҳем як рӯзи муайянро рӯзи моҳихӯрӣ интихоб намоем, ки дар ин рӯз дар тамоми корхонаву ташкилотҳо, муассисаҳои мактабиву томактабӣ, ҳама гӯшти моҳӣ истеъмол намоянд», - гуфт муовини вазири кишоварзӣ.