HӮШОКИҲОИ СПИРТӢ

Нӯшидани арақ ё дигар нӯшокиҳои спиртӣ на танҳо ба ҷисм, ба рӯҳу равони инсон низ таъсири манфӣ мерасонад. Ҳар боре, ки шахс шароб истеъмол мекунад, заминае барои бемориҳои гуногун фароҳам меорад.

Этил, ки дар аксари маводи спиртӣ мавҷуд аст, аввалан ба системаи марказии асаб таъсир мерасонад. Шахс оҳиста – оҳиста ба май одат намуда, минбаъд эҳсосоти нокифоягиро дар қалбаш ҳис менамояд ва оқибат ташвишу изтироб ӯро ба таври доимӣ фаро мегирад.

Истеъмоли пайвастаи маводи спиртӣ шахсро ба бемории майзадагӣ расонда, рӯҳияи одамро тағйир медиҳад ва ҳатто то ба ҷунунӣ оварда мерасонад. Ин бемории музмин ҷисми инсон, бахусус ба ҷисми зан бештар таъсири бад мегузорад. Беморӣ тавассути се марҳила мегузарад. Дар ду марҳилаи аввал бо қатъ намудани истеъмоли машрубот шахс метавонад аз пайвастагӣ ба он раҳоӣ ёбад. Дар марҳилаи сеюм одам пурра ғуломи шароб мешавад, фаъолияти узвҳои дарунӣ функсияҳои худро аз даст медиҳанд ва майхораро ба бемории рагу дил, гурда, ҷигар ва бахусус саратони ҷигар оварда мерасонад.

Истеъмоли машрубот, аз ҷумла ба ҷанин ва ташаккули он дар батни модар таъсири бад мерасонад. Кӯдаконе, ки аз мард ё зани майзада таваллуд мешаванд, эҳтимоли бо нуқсонҳои модарзодӣ ва ё ноқисулақлӣ мубтало буданро доранд.

Ларзиши панҷаҳои даст, ҳаракати номунтазами пойҳо, асабонияту инҷиқии аз ҳад зиёд паёмадҳои истеъмоли зиёди машрубот аст.

Алиҷон ҶОБИРОВ,
табиб