ҚОНУНИ БУҶЕТИ ДАВЛАТӢ БАРОИ СОЛИ 2015 ҚАБУЛ ШУД

Ба гуфти вазири молияи Ҷумҳурии Тоҷикистон хароҷоти беш аз 50 дарсади буҷети давлатии соли 2015 ба соҳаҳои иҷтимоии кишвар равона шудааст, ки ин нисбат ба соли равон 17% зиёд мебошад. Танҳо барои зиёдшавии музди меҳнат, нафақа ва стипендия беш аз 400 млн. сомонӣ пешбинӣ шудааст.

Мутобиқи лоиҳаи ин қонун маҷмӯи маҳсулоти дохилӣ барои соли оянда ба миқдори 52 миллиарду 821 миллион сомонӣ, болоравии ҳаҷми истеҳсолот бо ифодаи воқеӣ 7,2%, таваррум 7,5% ва индекси дефилятор 6,3% пешбинӣ мешавад.

Шодӣ Шабдолов, вакил аз Ҳизби Комунистии Тоҷикистон зимни баромади хеш иброз дошт, ки лоиҳаи Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2015» аз камбудию нуқсонҳо орӣ нест. Аз ин рӯ, дар баробари таҳияи лоиҳаи буҷет барои як сол мебояд тадбирҳои ҷиддӣ бобати пешгирӣ аз буҳрони эҳтимолии иқтисодӣ дар соли пешомад дида шаванд.

Ҳамчунин, дигар вакилони Маҷлиси намояндагон оид ба хатарҳои пешомади асъори миллӣ  ва аз тадбирҳои андешидаи иқтисоддону молияшиносон дар мавриди эҳтимолияти поин рафтани қурби пули миллӣ пурсон шуданд. Зеро вазъи иқтисодӣ ва сиёсии кишварҳои минтақа, аз ҷумла Федератсияи Русия, ки дучори таҳримҳои Аврупову Амрикост, метавонад ба иқтисоди кишварҳои минтақа, аз ҷумла Тоҷикистон таъсири манфӣ расонад.

Дар посух ба пурсишҳои вакилон масъулони Вазорати рушди иқтисоди Тоҷикистон иброз доштанд, ки зимни таҳияи Лоиҳаи Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2015» фарзияҳои эҳтимолии хатарҳои геополитикии минтақа омӯхта, ба инобат гирифта шудаанд.

Дар умум, иқтисоддонҳо боварӣ доранд, ки буҷети давлатӣ дар соли оянда иҷро мешавад. Гарчанде, ки хатарҳои коҳиш ёфтани даромадҳо ба буҷет, поин рафтани қурби пули миллӣ ва дигар омилҳои иқтисодӣ вуҷуд доранд, аммо  буҷети давлатӣ бо назардошти пешгирӣ аз ҳама гуна хавфу хатарҳои иқтисодӣ таҳия шудааст, - мегӯянд иқтисоддонҳо.

Бояд зикр намуд, ки тибқи Лоиҳаи буҷети давлатӣ барои соли 2015 ба соҳаҳои иқтисодиёт, энергетика, нақлиёт, алоқа ва иҷтимоиёт 5 миллиард сомонӣ ҷудо гардидааст.

Ҷамолиддин Сайфиддинов