БОНУВОНИ СОҲИБКОРРО ДАСТГИРӢ МЕБОЯД

Сабоҳат Раҳимзода, сарвари Ассотсиатсияи миллии занони соҳибкори «Кадбону» минҷумла дар сухани ифтитоҳиаш ҳадафи баргузории ин чорабиниро чунин шарҳ дод:

- Ҳадаф аз ташкил намудани чорабинии мазкур ба роҳ мондани мубодилаи таҷриба, тақвияти ҳамкории байни ташкилотҳои қарзӣ ва созмонҳои бонувони соҳибкор, инчунин роҳандозии ҳамкорӣ дар байни онҳо, додани тавсияҳо перомуни беҳбудсозии маблағгузории занони соҳибкор ва зиёд кардани бонувон дар низоми бонкӣ мебошад. Рушди соҳибкорӣ ва густариши ҳамкории созанда дар ҷумҳурӣ меҳвари асосии ҳалли масъалаҳои иқтисодӣ ва иҷтимоӣ буда, ширкати бонувон дар бартараф намудани ин мушкилот муҳим аст. Дастгирии бонувони соҳибкор яке аз самтҳои ҳадафноки рушди истеҳсолоти дохилӣ ба шумор рафта, занон бояд аз ҷониби ташкилотҳои қарзӣ дастгирӣ ва бо қарзҳои камфоиз таъмин карда шаванд.

Тибқи маълумотҳои расмии оморӣ тайи даҳ соли соли охир дар маҷмӯъ тақрибан 28 миллиард сомонӣ қарзҳои хурд ҷудо гардидааст, ки аз он наздики 7 миллион сомонӣ (25 фисад) барои дастгирии бонувон дар самти соҳибкорӣ равона шудааст.

- Ассотсиатсияи миллии занони соҳибкори «Кадбону» дар ҳалли масъалаҳои гендерӣ, дастгирии ташаббусҳои занони соҳибкор, тавассути барномаҳои омӯзишӣ ҷиҳати баланд бардоштани маърифати фарҳанги иқтисодии онҳо ва ҳимояи ҳуқуқҳояшон саҳм мегузорад. Дар давоми фаъолияти худ ассотсиатсияи мазкур тавонист, ки беш аз 2300 бонуро ба соҳибкорӣ ҷалб намояд ва нозукиҳои тиҷоратро ба онҳо омӯзонад, - қайд кард С.Раҳимзода.

Дар зимн музокирачиён дар баромадҳои худ инчунин аз мушкилоти имрӯзи бонувон дар самти пешбурду ривоҷи соҳибкорӣ, аз ҷумла, баланд будани фоизи қарзҳои бонкӣ ва кӯтоҳ будани мӯҳлати пардохти қарзҳо ибрози андеша карданд. Дар ҳамоиш ба бонувони соҳибкор аз ҷониби мутахассисин, намояндагони ташкилотҳои бонкӣ ва созмонҳои молиявӣ тавсияҳои судманд барои рушди минбаъдаи фаъолияташон ироа шуд.

Қутбия