«40 СОЛИ ФАЪОЛИЯТИ ИЛМИЮ ЭҶОДИИ МОҲРУХСОР САФИЕВА». БА ИН МУНОСИБАТ МАҲФИЛИ ИЛМИЮ ФАРҲАНГӢ ДОИР ШУД

         Дар Донишкадаи давлатии фарҳанг ва санъати Тоҷикистон ба номи Мирзо Турсунзода бахшида ба 40-солагии фаъолияти илмӣ ва эҷодии Ҳунарпешаи шоистаи Тоҷикистон, дотсенти кафедраи сарояндагии халқӣ Моҳрухсор Сафиева санаи 31 март маҳфили илмию фарҳангӣ баргузор гардид.

         Дар чорабинӣ аз фаъолияти ҳунарӣ ва эҷодии ҳунарманд шурӯъ аз давраҳои шуравӣ ва то имрӯз маълумоти зиёде пешкаш гардида, устодони шогирдони ин бонуи ҳунарманд бо самимияти хосса аз роҳи паймудаи ӯ дар ҷодаи санъат, саъю талошу эҷоду эъҷозаш сухан гуфтанд. Таъкид намуданд, ки муаллима тӯли ин солҳо ба жанри сарояндагии халқӣ содиқ монда, барои аз байн нарафтани ин санъати анъанавӣ саҳми беандоза гузоштааст. М. Сафиева дар маърӯзаи хеш дар мавриди санъати сарояндагии ҳунармандони минтақаи Рашт сухан намуда, аз ҷумла иброз дошт, ки ду бонуи ҳунарманди ин минтақа Гулрафтор Шаҳобова ва Қумрӣ Қодирова бо санъати баланди навозандагӣ ва сурудхонӣ солҳои зиёд ба дили мардум маъво ёфта, маҳбуб гашта буданд, ки ҳоло аз санъати волои онҳо дар бойгонии телевизион ва радиоҳои ҷумҳурӣ кам мавод боқӣ мондааст ва месазад, ки дар ин самт таҳқиқу пажӯҳиш идома ёбанд.     

         Шоири халқии халқии Тоҷикистон Гулрухсор Сафиева чун хоҳари бузурги ӯ аз кӯдакиҳои ҳунарманд ёдовар шуда, барои ӯ сатрҳои тозаэҷод қироат намуд.

         Донишҷӯёни донишкадаи мазкур, шогирдони муаллима Моҳрухсор Сафиева бо саҳнаҳои хубу хотирмон, қироату шеъру сурудхонӣ маҳфилро гарму тамошобоб намуданд.

         Дар идомаи маҳфил ҳунармандони шинохтаи Тоҷикистон Файзалӣ Ҳасанов, Дони Баҳром, Давлатманд Холов, Ҳаётой Муъминова, Лола Азизова, Давлат Назрӣ ва дигарон таронаҳои марғубу дилнишин сароида, хотири ҳамагонро болида гардонанд.

             С. Ашўрова