НУҲУФТАҲО ВА ШУКУФТАҲО (РУБОИЁТ)

 

***

Шаҳду шакаранд духтарони тоҷик,

Лаълу гуҳаранд духтарони тоҷик.

Хушрӯйтарини оламанду аммо

З-ин бехабаранд духтарони тоҷик.

***

Тоҷикписарон, шумо басо зебоед,

Бо ҳусни расо намуна дар дунёед.

Ҳамхона шудан ба халқи бегона чаро?

Чун сарвати миллиед, ҳаққи моед!

***

Сарҳад машикан, ки ман амини Ватанам,

Ҳар ҳад машикан, ки дар замини Ватанам.

Гӯӣ, ки писар наям, ки аскар бошам?

Ман духтари аскарофарини Ватанам!

***

Гуфто, ки нигори Тоҷикистон зебост,

Монанди баҳори Тоҷикистон зебост.

Гуфтам, ки бале, дуруст гуфтӣ, меҳмон,

Зеро ки диёри Тоҷикистон зебост!

***

Ҳар вожаи тоҷикии мо пурмаъност,

Ҳам Модару ҳам Худову Наврӯз аз мост.

Ҳам Оташу Обу Зиндагӣ, ҳам Хуршед,

Пас лафзи ману ту беҳтарин дар дунёст!

***

Роғун, ту макони имтиҳонӣ, Роғун,

Номуси тамоми тоҷиконӣ, Роғун.

Исбот намо тавону зӯри миллат,

Дар маркази диққати ҷаҳонӣ, Роғун!

***

Помириӣ ту ва ё ки раштониӣ,

Кӯлобиӣ ту ва ё ки вахшониӣ.

Аз Суғд туӣ ва ё зарафшониӣ,

Ҷонам ҳастӣ, чу тоҷикистониӣ!

***

Гар хор ба пои ту халад, дард кашам,

Аз сӯзи дил оҳи хастаи сард кашам.

То, баччаи ман, шавӣ ту як марди калон,

Ман заҳмати бештар зи сад мард кашам.

***

То чанд бувад чунину то чанд бувад,

Мо занг занему муштарӣ банд бувад.

Эй ҳамнафаси шуда зи мо бегона

Ҷуз мо рақами ту бо кӣ пайванд бувад?!

***

Бар ҷумлаи бонувон сафо металабам,

Бар ҷумла бародарон вафо металабам.

Бар ҳар ки ба ҳамсараш хиёнат кардаст,

Аз даргаҳи Ҳақ фақат ҷафо металабам.

***

Ҳар гӯшаи ин Ватан аз они ману туст,

Ҳар майсаи ин чаман аз они ману туст.

Ҳам атласи чун хаёли шоир рангин,

Ҳам адрасу ҳам чакан аз они ману туст!

***

Мо, ҷумлаи тоҷикон зи як анҷуманем,

Ҳамрешатарин санавбарони чаманем.

Байни ману ту мабод дурӣ, эй дӯст,

Охир ману ту зи домани як Ватанем!!

***

Эй зан, ту мароми хеш аз даст мадеҳ,

Як лаҳза зимоми хеш аз даст мадеҳ.

Донӣ, ки ҳуқуқи ту баробар бо мард,

Пас ҳеҷ мақоми хеш аз даст мадеҳ!

Раънои МУБОРИЗ