ГУЛИ МУҲАББАТ

 

***

Беҳтарин шеъри офаридаи Парвардигор модар аст.

Ба ҳама забон метавонаш хонд, ба ҳама забон метавон суруд.

***

Шохаҳои дарахти меҳри модарони дунё рӯзе ба ҳам печанд, тавонотарин бӯрони офат наметавонад онро аз бех канад.

***

Кӯҳҳо бо сарандози сапеди барфӣ модаронро монад.

Қуллаҳои остинпӯши сапедаш сокит, ба дастони ба дуо бикшодаи модар шабеҳ аст.

Орзуҳои сафеди модар поянда бод!

***

Шаб ангор чашмони сиёҳи модари ман бошад, ки ҳанӯз ба ҳарфи ашки ситораҳо бароям афсона мебофад.

***

Поктарин таҳорат – такрори номи модар аст.

***

Кист, ки мисли модар тавонад аз ҷон, аз дил биофарад?

***

Бузургии модарон дар он аст, ки Чингизро ҳам ба дунё додаву Суқроту Афлотунро низ.

***

Баъди рафтани модар мо гармтарин оғӯш, нармтарин сухан ва шевотарин нағмаи зиндагии худро гум мекунем.

***

Хуршеду гулу обшор ба забони модар ҳарф мезананд.

***

Аллаи модар рӯшноист дар дили шаби торик.

***

Баҳру уқёнусҳои азим лаб фурӯ бастаанд.

Кӯҳҳои сарафрохта дар сукутанд.

Рӯзе аз бузургии муҳаббати модар суол кунанд, ҳарф хоҳанд зад.

***

Хоки пойи модарон беҳтарин сурмаи дард аст.

***

Биҳиште гар дар ин дунё ҳаст, суҳбату дидори модар аст.

***

Ҳар кӣ озори модарро раво дид, ҳич муҳаббатеро шоиста нагардад.

***

Баҳори орзуи модар дашту биёбони сӯзонро ҳам сабз мегардонад.

***

Марги модар барои мо афсона аст, ки бовар намекунем.

***

Умеди модар то охирин нафас сабз аст.

Ҳар кӣ ин умед хазон кард, хоҳад сӯхт.

***

Дили модар офтоби ҳар рӯзи мост.

 

Сабрин