Хатогӣ

• JLIB_DATABASE_ERROR_FUNCTION_FAILED

1. Руқия Қурбонова
(20 нафар)
Муовини сарвазир. Ба навиштаи як коршинос ӯ «дар даҳ соли охир исбот кард, ки дар Ҳукумат кадри тасодуфӣ нест ва «интригаҳо» низ ҳурмату эҳтиромашро поин набурд». Баъзеҳо аз иқдоми муовини сарвазир дар бораи «Чакомаи гесӯ» бо тамасхур ёд кардаанду баъзеҳо ба сифати як ташаббуси таъсиргузор будани он. ӯ барои бисёр коршиносони мо, ки номашро дар рӯйхат навиштаанду сифатеро дареғ надоштаанд, ҳамоно як бонуи ҳукуматист.

2. Хайринисо Юсуфӣ
(18 нафар)
Раиси Кумита оид масъалаҳои иҷтимоӣ, оила ва ҳифзи саломатӣ дар Маҷлиси намояндагони МОҶТ. Коршиносон таъкид намудаанд, ки ӯ яке аз бонувони босавод ва эътирофшуда аст. Бахусус нутқи бурро ва бо забони фасеҳи тоҷикӣ сӯҳбат карданаш боиси қадрдонист. Дар ин замина як коршинос навиштааст: «Агар ҷасорати Гулрухсорро медошт, як шахсияти миллӣ мешуд».

3. Озода Раҳмонова
(17 нафар)
Муовини вазири корҳои хориҷии ҶТ. Ҳамчун шогирди мактаби сиёсии падараш – Президент Эмомалӣ Раҳмон мавриди таваҷҷӯҳи коршиносони мо қарор гирифтааст. Онҳо мӯътақиданд, ки интихоби Озода бесабаб нест. Шояд ӯ хусусиятҳое дорад, ки мо бо онҳо ошно нестем. Ягона андешае, ки дар мавриди Озода Раҳмонова гуфтаанд, ин аст, ки то имрӯз ба ғайр аз чанд мусоҳибааш дар бораи шиносномаҳои биометрӣ сӯҳбати дигаре бо журналистон анҷом надодааст. Ба таъсиргузор будани ӯ касе шубҳа накардааст. Шояд баъдан ВАО чеҳраи сиёсии ӯро рӯшантар мекушояд.

4. Ойниҳол Бобоназарова
(16 нафар)
Ҳуқуқшинос. Баъзеҳо мегӯянд, декани собиқи факултаи ҳуқуқшиносӣ шояд аз рӯи инертсия, яъне обрӯи дар солҳои 90-уми асри пор доштааш, то ҳанӯз ба сифати бонуи шинохтаву таъсиргузор дониста мешавад. Аммо баъзе аз коршиносон дар асоси сӯҳбатҳои зиёдаш бо расонаҳои хабарӣ, иқдомаш барои дидор аз маҳбасҳо мегӯянд, ки зарфиятҳои ин бонуро имрӯз низ сарфи назар кардан нашояд. Фаъолияти густурда ва ҳамеша дар маркази таваҷҷӯҳи ҷомеа буданаш, собитгари таъсиргузории ӯст.

5. Марҳабо Ҷабборова
(15 нафар)
Раиси Кумита оид ба илм, маориф, фарҳанг ва сиёсати ҷавонони Маҷлиси намояндагон. Дар борааш коршиносони мо хеле кам гуфтаанд, аммо номашро зикр кардаанд. Шояд ин марбут ба мусоҳибаҳои зиёдаш дар матбуот ва вобаста ба Қонун «Дар бораи масъулияти падару модар дар тарбияи фарзанд» бошад. Ин бону шояд ба ҳайси як зани сарвар пазируфтаи коршиносон қарор ёфтааст.

6. Сумангул Тағоева
(14 нафар)
Раиси Кумитаи кор бо занон ва оилаи назди Ҳукумати ҶТ. Ҳеҷ кадоме аз коршиносонамон дар бораи хусусиятҳои барҷастаи ӯ чизе нагуфтаанд. Шояд ин ба он марбут аст, ки раиса то ҳанӯз хомӯширо барои худ беҳтар дониставу зарфиятҳои хешро ошкор насохтааст. Хоксор асту дар «соя» буданро авлотар мешуморад. Аз ин хотир коршиносон бо овардани ному вазифа аш иктифо карданд.

7. Ситора Шерова
(13 нафар)
Муовини раиси вилояти Хатлон. Ӯ дар гузашта раиси ноҳияи Варзоб ва пеш аз ин раиси Кумитаи кор бо занон ва оила низ буд. «Ҳамчун муовини раиси вилояти Хатлон ягона зане ҳаст, ки дар дилхоҳ масъалаҳо назари фардии худро дорад ва бе иҷозати «мардҳои боло» мушкилотро ҳал карда метавонад», навиштааст як коршиноси мо. Дар ҳар сурат зиёда аз даҳ коршинос зарфияти таъсиргузории ӯро эътироф кардаанд.

8. Гулрухсор Сафиева
(12 нафар)
Шоири Халқии ҶТ. Баҳои коршиносонро пешорӯи хонанда мегузорем: «Ҳар китоб ва ҳар шеъре, ки имрӯз менависад, дар ҷомеаи тоҷик вокунишҳои шадидро ба бор меорад. Ягона занест, ки ҳар чизе нависад, шумораи дӯстону душманонаш зиёд мешавад». «Ҳарчанд мақоми расмӣ надорад, ҳоло ҳам дар ҷомеа таъсиргузор аст». Бону Гулрухсор ба муаррифии дигар ниёз надорад.

9. Саодат Амиршоева
(11 нафар)
Вакили Маҷлиси намояндагони МОҶТ. Ягона генералбонуи тоҷик. Ба гуфтаи коршиносони мо бурди ин хонум аз он аст, ки аз музофот ба майдони васеи сиёсат ворид шуд ва «Аз ин рӯ, муваффақ аст». Шахсоне, ки ин бонуро мешиносанд аз принсипнокӣ ва ҷасораташ ва ҳатто «лафз»-и мардонааш ҳадс задаанд.

10. Ҳуриннисо Ализода
(10 нафар)
Сармуҳаррири маҷаллаи «Бонувони Тоҷикистон». Бону Ализода ба гуфти коршиносони мо «афсонаҳо»-ро дар ин бора, ки:  «бо гирифтани мансаби давлатӣ забонат «баста» бояд бошад», ботил баровард. Мӯҳтавои маҷаллаи «БТ» дар ҷасурона масъалагузориҳои он ва инъикоси воқеияти зиндагии мардум тақрибан аз матбуоти мустақил кам намеояд. Илова ба ин, ҳатто баъзе аз нашрияҳо матлабҳои чандин сол пеш чопкардаи ӯро дубора ба нашр расонидаанд. «Оё ин гуна бонуро метавон таъсиргузор нагуфт?» – суол пеш гузоштаанд чанд коршиноси мо.

11. Махфират Хидирова
(9 нафар)
Раиси фраксияи ҲХДТ, вакил. Аз ҷумлаи вакилони мардумӣ дар Парлумон аст, ки дар соҳаи худ, яъне қонунгузорӣ, мутахассиси варзида аст. Вокунишҳояш дар таҳияи қонунҳо аз он далолат мекунанд, ки ҳарфаш қотеъ ва бо далелу бурҳон аст. Чун олим ва сиёсатмадор эътирофгашта ва ҳамчун як вакили сермаҳсул шинохта аст.

12. Файзиниссо Воҳидова
(8 нафар)
Ҳуқуқшинос. Дар дилхоҳ масъала аз нигоҳи ҳуқуқӣ баҳогузорӣ мекунад. Ҳамчунин, ӯ тавонист, то кунун ҳуқуқи чанд зерҳимояаш, аз ҷумла журналист Урунбой Усмоновро дар судҳо ҳимоя кунад. Дар ин замина, як коршинос навишта: «Ӯро мешавад ҳатто «Бонуи оҳанини тоҷик» номид, ки бозгӯи принсипнокиаш аст.

13. Олга Тутубалина
(8 нафар)
Журналист. Бо навиштаҳои рӯзмарра ва ҷасорати нодираш аз ҳамаи журналистмардон фарқ мекунад. «Дар чанд соли охир дар журналистикаи русзабони тоҷик таҳаввулоте ба миён овардааст. Тавонист, ки реверанти ҳамешагии журналистикаи русро ба сӯи Русия тағйир диҳад ва журналистикаи русзабони тоҷикро воқеан журналистикаи миллӣ гардонад. Мавқеи шахсӣ ва шинохти хуб аз воқеияти кишварро дорад».

14. Рафиқа Мӯсоева
(7 нафар)
Бонуи сиёсатмадор, собиқ вакили Парлумон ва феълан раиси Ассотсиатсияи энергетикҳои Тоҷикистон. «Чанд муддати дигар, агар аз худ дарак намедод, шояд номаш ба фаромӯшӣ мерафт. Аммо тайи ду ҷаласаи ахири Шӯрои ҷамъиятӣ боз ҳам нишон дод, ки «ҳоло ҳам ҳамон аст». Ҳатто як рӯзнома ӯро ба мақоми алтернативии вазири энергетика ва саноат пешниҳод намуд. Агар дар сиёсат мавқеъ пайдо кунад, бурди сиёсат мешуд. Дар кор ҷонфидо буда метавонад.

15. Зевар Давлатова
(7 нафар)
Директори телевизиони кӯдакон ва нав­расони «Баҳористон». Дар пайдо намудани кӯдакони болаёқат ва беҳтар намудани сифати барномаҳои телевизионӣ ҷӯянда аст. Аз ҷумла, пас аз ба мақоми раиси ТВ «Баҳористон» омадан, комилан ин шабака ранги дигар гирифт ва мустақилияти расонаиро касб кард. Ба ифодаи як коршинос, «Ӯ намунаи хуби менеҷери давлатӣ аст».

16. Гулнора Ҳасанова
(6 нафар)
Раиси «Амонатбонк». Ягона бонуи бонкир дар сатҳи баланд аст. Коршиносони мо таъкид карданд, ки ҳамкориҳои ин бонк бо расонаҳо ба обрӯи раиса бештар таъсир гузошта, шинохту эътирофи иҷтимоии вайро боло бардоштаанд. Онҳое, ки номи Гулнораро зикр кардаанд, аз ояндаи хуби вай умедворанд.

17. Муҳаббат Ҷӯраева
(4 нафар)
Ҳукуқшинос. Дар қисмати шимоли Тоҷикистон худро ба унвони нахустин раиси Додгоҳи ҳакамӣ хуб муаррифӣ карда тавонист ва беш аз 100 баҳси мардумиро ҳал намуд. Коршиносон дар ишора ба принципнокиаш ӯро эътироф кардаанд.

18. Матлуба Ӯлҷабоева
(3 нафар)
Раиси Анҷумани миллии соҳиб­кории хурду миёнаи Тоҷикистон. Барои дифоъ аз ҳуқуқи тоҷирон талошҳоеро дар назди Кумитаи андоз анҷом додааст. Аз суханрониҳояш дар маҳфилҳову чорабиниҳои ватаниву байналмилалӣ маълум аст, ки мутахассиси соҳаи худ аст ва барои рафъи камбудиҳо талош меварзад.

19. Мунзифа Ғаффорова
(2 нафар)
Доктори илмҳои фалсафа, Ходими хизматнишондодаи илм, профессор, зани мубориз. Баҳои як коршинос: «Дар гузашта бо ҷуръату кордонии худ дар ҷомеа таъсиргузор буд ва имрӯз низ дар тарбияи олимон саҳмгузор аст».

20. Нигина Амонқулова
(2 нафар)
Сароянда. Баъди бо либоси миллӣ ва симои тоҷикона рӯи саҳна қадам гузоштанаш, духтарони тоҷик ба ӯ пайравӣ карданд, ҷавонон ба суруду оҳангҳои халқии тоҷикӣ рӯ оварданд. Сараввал бо он ки такрори дигаронро месуруд, шубҳае ба истеъдодаш буд, вале моҳҳои охир «ҷаҳиш»-и баланде дар таронаҳои тозаэҷодаш қадрашро боло кард. Таъсиргузории Нигинабону шояд оянда бештар шавад.

Ба 20 чеҳраи таъсиргузори ҷомеа ин коршиносон баҳогузорӣ карданд:
Абдуазими Абдуваҳҳоб, журналист
Абдуфаттоҳ Шарифзода, котиби матбуотии Президенти ҶТ
Абдуғаффори Камол, сармуҳаррири барномаҳои ТВ «Ҷаҳоннамо»
Бахтиёр Ҳамдамов, сармуҳаррири ҳафтаномаи «Минбари халк»
Гурез Қосимов, сардори Раёсати хизмати давлатии назди Президенти ҶТ
Маликшо Неъматов, Раиси Кумитаи кор бо ҷавонон, варзиш ва сайёҳии назди Ҳукумати ҶТ
Мирзошоҳрух Асрорӣ, Вазири фарҳанги Ҷумҳурии Тоҷикистон
Муҳиддин Кабирӣ, раиси ҲНИТ, вакили Маҷлиси намояндагон
Марат Мамадшоев, муҳаррири ҳафтаномаи «Азия плюс»
Нуриддин Саидов, Вазири маорифи Ҷумҳурии Тоҷикистон
Низом Қосим, шоир, вакили Маҷлиси намояндагон
Саидмурод Фаттоев, мушовири давлатии Президенти ҶТ
Садриддин Шамсиддин, директори АМИТ «Ховар»
Сӯҳроб Шарипов, вакили Маҷлиси намояндагон
Сайёфи Мизроб, сардабири ҳафтаномаи «СССР»
Сайфулло Сафаров, муовини директори маркази тадқиқоти стратегии назди Президенти ҶТ
Саймиддин Дӯстов, роҳбари созмони чамъиятии «Индем»
Хуршед Ҳамдамов, роҳбари намояндагии радиои “Озодӣ” дар Тоҷикистон
Шодӣ Шабдолов, раиси ҲКТ, вакили Маҷлиси намояндагон
Шокирҷон Ҳакимов, ҳуқуқшинос