БА БОНУВОН РОҲ КУШОЕД!

Президенти кишвар дар баробари  таваҷҷӯҳи «мардони ҳузарб»-ро, ки аксаран курсиҳои раисиро ишғол кардаву  ба занон имкони ишғоли  мансабҳои калидиро камтар кардаанд,ба ин масъала ҷалб намудан,  таъкид дошт, ки фурсати он расидааст, ки  ба бонувон  низ роҳ кушоянд.

Ҷаноби Олӣ аз риоя нашудани банди дуюми Фармони Президенти Тоҷикистон «Дар бораи баланд бардоштани нақши занон дар ҷомеъа» хоса изҳори назар карда, ба масулин супориш дод, ки ҳарчи зудтар ба ислоҳи он бипардозанд.

Боиси хушнудии бонувон ин нуктаи хоси дастури  Президенти Тоҷикистон шуда метавонад, ки дар баробари изҳори норизоӣ аз  имкони ками дастрасии занон ба мансабҳои давлатӣ , баҳри рафъи он  ба раиси Кумитаи занон супориш дод, ки Барномаи давлатии дарёфти мутахссисони соҳибистеъдоду  кадрҳои сазоворро  аз ҳисоби занон,  омода созад.

Воқеан,  кас  ба толори пур аз мардони ҷаласаҳои ҳукуматӣ нигариста,  ба андешае меояд,  ки модари тоҷик фақат бачаи раис ва духтари хонашин (метавон калимаҳои: хизматгор, камсавод, беҳунар, ақлкутоҳ, беистеъдод ва ғайраҳоро ин ҷо истифода кард ) зоида аст. Кулли омӯзгорон бар он назаранд, ки аълохонҳои мактаб аксаран духтараконанд, мактаби олиро ҳам бештар бо баҳои хубу аъло ва фаъолона духтарон тамом мекунанд, вале кас  ба ишғоли мансабҳо ва ҷойҳои «равғанӣ» ва корҳое, ки ба ҷуз фармонфармоӣ заҳмати ҷисмониро талаб намекунад, ба бачаҳо мерасад. Чаро кам андарками онҳо ба мансабу вазифа мерасанд, ва ё бирасанд ҳам дар ҷойҳои дуюму чандумдараҷа? Ин суолест, ки посух ба онро Президенти кишвар ба масъулини Ҳукумат вогузор кард.

Хонадаи азиз,метавон боз аз он сари тафохур боло кард, ки ҳамин нияти неки Президенти мӯҳтарамамонро нашрияи таъсисдодааш «Бонувони Тоҷикистон» дар мувофиқа бо Ҷаноби олӣ,  аллакай шурӯъ аз моҳи март амалӣ карда истодааст. Озмуни «Чеҳракушоӣ»-и маҷаллаи мо, аллакай чеҳраҳои 10-нафар мутахассисонеро барои ҷомеъа кушодааст, ки метавонанд дар сатҳҳои гуногуни роҳбарӣ фаъолият дошта бошанд. Ин амал идома дорад ва итминони комил дорем, ки саҳми босазое дар иҷрои ин нияти неку сиёсати гендерии Сарвари давлат хоҳад шуд.