Хушхабар! Китоби тозанашри “Бонувони Тоҷикистон - чеҳраҳо, Истиқлолият”-ро манзури ҳаводорон ва хонандагони азиз менамоем

Дар ин маҷмуа мусоҳибаву мақолаҳо, очерку лавҳаҳо ва дигар матлабҳо дар жанрҳои гуногуни журналистӣ, ки аз ҷониби рӯзноманигорони ҳирфаӣ тайи солҳои 2017 – 2022 таҳия гардидаанд, гирд оварда шудаанд. Ҳамчунин ҳикоя ва шеъру таронаҳои дилнишини адибони шинохта, ҷавонони навқалам ва ҳаводорони доимӣ, ки дар маҷаллаи “Бонувони Тоҷикистон” тули ин муддат нашр гардидаанд, саҳфаҳои ин китобро рангин месозанд.

Матлабҳо аз Рӯзи Истиқлоли давлатии Тоҷикистон, аҳамияти таърихии Иҷлосияи сарнавиштсози XVI Шурои Олии Ҷумҳурии Тоҷикистон, ташаббусҳои беназири Пешвои муаззами миллат муҳтарам Эмомалӣ Раҳмон, дастовардҳои кишвар дар зарфи 30 соли охир, чеҳраҳои бонувони муваффақу номошнои мамлакат, занону духтарони заҳматқарину ҳунарвари кишвар, худшиносию ватанпарастӣ, расму оинҳои миллӣ, шукӯҳу шаҳомати ҷаҳонӣ ёфтани шаҳри дилорои Душанбе, таълиму тарбияи фарзанд ва ғайра ҳикоят мекунад.

Маҷмуаи мазкур аз 464 саҳифа иборат буда, дар матбаии “Шарқи Озод” бо теъдоди 2000 нусха ба нашр расидааст ва ба доираи васеи хонандагон пешкаш мегардад.