Зодаи Тоҷикистон дар озмуни байналмилалӣ соҳиби ҷоизаву диплом гардид

   Аслигул Тиллохонова зодаи Тоҷикистон дар Озмуни байналмилалии забони англисӣ ва арабӣ дар шаҳри Қоҳираи Ҷумҳурии Арабии Миср комёб гардида, соҳиби ҷоиза ва диплом шуд, хабар медиҳад АМИТ «Ховар».

Чанде қабл тариқи онлайн Озмуни байналмилалии забони англисӣ ва арабӣ баргузор шуд, ки Аслигул Тиллохонова дар он иштирок намуда, сипас ба шаҳри Қоҳираи Ҷумҳурии Арабии Миср даъват шуд. Ӯ дар Донишгоҳи Ал-Азҳари шаҳри Қоҳира миёни 43 давлати дунё баромад намуда, соҳиби ҷоиза ва диплом гардид. Аслия ҳамзамон соли 2017 дар шаҳри Вашингтон дар барномаи «Flex» иштирок карда, миёни 35 давлат ҷои 3-юмро соҳиб шуда буд.

Мавсуф хатмкардаи факултети забони англисӣ бо ихтисоси тарҷумони забони англисии Донишгоҳи давлатии Бохтар ба номи Носири Хусрав мебошад.

Ёдовар мешавем, ки соли 2003 Фармони Президенти Ҷумҳурии Тоҷикистон «Дар бораи такмили таълим ва омӯзиши забонҳои русӣ ва англисӣ дар Ҷумҳурии Тоҷикистон» ба имзо расида буд, ки дар асоси он се маротиба барномаҳои давлатӣ қабул гардиданд. Охирин Барномаи такмили таълим ва омӯзиши забонҳои русӣ ва англисӣ дар Ҷумҳурии Тоҷикистон соли 2019 қабул гардида, татбиқи он барои давраи то соли 2030 пешбинӣ шудааст.