Донишгоҳи давлатии тиббии Тоҷикистон ба номи Абуалӣ ибни Сино аввалин шуда, ба пуррагӣ ҳамаи барномаи таълимиро аз аккредитатсияи байналмилалӣ гузаронида, соҳиби сертификати мутобиқат ба стандарти Федератсияи умумиҷаҳонии таҳсилоти тиббӣ гардидаст, чунин иттилоъ дод ректори донишгоҳ Маҳмадшоҳ Гулзода зимни нишасти матбуотие, ки 13 июл дар донишгоҳи мазкур доир гардид.
Номбурда афзуд, ки доштани сертификати мазкур далели таъмини таҳсилоти босифат буда, барои донишгоҳ имкониятҳои нав ва эътирофи байналмилалӣ доштани онро тасдиқ менамояд.
Зимни нишаст зикр шуд, ки дар соли равон 1874 нафар донишҷӯён, аз ҷумла, аз факултети тиббӣ 1164 нафар, педиатрӣ 96 нафар, стоматологӣ 166 нафар, фармасевтӣ 63 нафар ва аз тиббӣ-профилактикӣ 29 нафар имтиҳонҳои хатмро бо муваффақият супориданд. Аз теъдоди умумии хатмкунандагон 253 нафар тибқи Квотаи президентӣ таҳсил намуда, 356 нафарашонро донишҷӯёни хориҷӣ ташкил медиҳад.
Ба гуфти Маҳмадшоҳ Гулзода, 44, 7 фоизи донишҷӯёнро дар донишгоҳ духтарон аз шаҳру ноҳияҳои мамлакат ташкил медиҳанд. Аз шумораи умумии бо Квотаи президентї таҳсилдошта 50 фоизашон низ духтарон мебошанд.
Донишгоҳи мазкур бо 61 муассисаҳои таълимию илмӣ ва ташкилотҳои хориҷӣ шартномаи ҳамкорӣ бастааст. Дар нимсолаи аввал 2 созишномаи дуҷониба тамдид ва 6 созишномаи дуҷониба бо муассисаҳои таълимию илмии Федератсияи Россия, Кореяи Ҷанубӣ ва Ҷумҳурии Қазоқистон ба имзо расидааст.
ФАРЗОНА