БОРИ АВВАЛ ДАР ТОҶИКИСТОН ОЛИМПИАДАИ БАЙНАЛМИЛАЛИИ «ISI JUNIOR-2022» ОИД БА ТЕХНОЛОГИЯҲОИ ИНФОРМАТСИОНӢ ДОИР МЕГАРДАД

    Бо ибтикори мақомоти иҷроияи ҳокимияти давлатии шаҳри Душанбе дар Муассисаи давлатии таълимии «Литсейи № 3 барои хонандагони болаёқат»-и назди Сарраёсати маорифи шаҳри Душанбе 2 июл маросими ифтитоҳии Олимпиадаи байналмилалии «ISI Junior-2022» оид ба технологияҳои информатсионӣ баргузор гардид.

    Бино ба маълумоти Сарраёсати маорифи шаҳри Душанбе олимпиадаи байналилалии «ISI Junior-2022» оид ба технологияҳои информатсионӣ ҳамоиши илмиву таҷрибавии маъруф ва озмудашудаи кӯдакону наврасони соҳибистеъдод ба шумор рафта, он бори аввал бо ташаббуси Сарраёсати маорифи шаҳри Душанбе тибқи қарори Раиси шаҳри Душанбе аз 9 июни соли 2022, №289 дар пойтахти Ҷумҳурии Тоҷикистон - шаҳри Душанбе баргузор мегардад.

    Баргузории Олимпиадаи байналилалии «ISI Junior-2022» оид ба технологияҳои информатсионӣ дар шаҳри Душанбе аз ҷониби дигар кишварҳо ҳамовозии амиқ пайдо намуда, дар он 27 дастаи олимпии наврасон - 158 нафар хонанда ва 28 мураббӣ аз давлатҳои Тоҷикистон, Қазоқистон, Қирғизистон, Ӯзбекистон, Белорусия, Афғонистон, Туркманистон ва Федератсияи Россия иштирок доранд.

    Ҳамзамон, наврасони кишварҳои Озарбойҷон, Муғулистон, Ҳиндустон, Шри-Ланка, Хитой, Сурия ва Куба дар 20 даста, ки 134 нафарро ташкил медиҳанд, ба тариқи фосилавӣ дар кори он ширкат меварзанд.

    Боиси тазаккур аст, ки Олимпиадаи байналилалии «ISI Junior-2022» оид ба технологияњои информатсионӣ рӯзҳои 1 то 7 июли соли 2022 дар шаҳри Душанбе идома меёбад.