АМИНА МУҲАММАД - МУОВИНИ ДАБИРИ КУЛЛИ СММ БА НОҲИЯИ РӮДАКӢ РАФТ

7 июн муовини Дабири кулли Созмони Милали Муттаҳид Амина Муҳаммад, ки барои иштирок дар Конфронси дуюми байналмилалии сатҳи баланд оид ба Даҳсолаи байналмилалии амал «Об барои рушди устувор, солҳои 2018-2028» дар Тоҷикистон қарор дорад, аз Маркази саломатии деҳоти Сарикиштии поёни ноҳияи Рӯдакӣ боздид намуд, -хабар медиҳад Вазорати тандурустӣ ва ҳифзи иҷтимоии аҳолии Ҷумҳурии Тоҷикистон.

Ҳадаф аз боздиди муассисаи мазкур пеш аз ҳама, шиносоии бевосита бо  ҷараёни  хизматрасонии тиббӣ ба аҳолии деҳот мебошад. Мавсуф бо фаъолияти муассисаи мазкур, аз ҷумла рафти муоина ва ташхиси беморон шинос шуда, инчунин аз масъулин доир ба сатҳи хизматрасонии тиббӣ  ба аҳолӣ пурсон шуд.

Ҳамзамон бо ҷараёни Корвони саломатии сайёр, ки аз ҷониби Вазорати тандурустӣ ва ҳифзи иҷтимоии аҳолӣ ташкил гардидааст, шинос шуда, бо як қатор намояндагони сохторҳои гуногуни давлатӣ ва ташкилотҳои ҷамъиятӣ суҳбати озоду ошкоро анҷом дод.

Дар анҷоми боздид Амина Муҳаммад  ба як қатор занону духтарон, ки дар доираи Корвони саломатии сайёр дар  муассиса қарор доштанд, туҳфаҳои хотиравӣ тақдим намуд.