ПИРӮЗИИ НАВБАТИИ ШОИРА ЗУЛҚАЙНАРОВА

Тавре Агентии иттилоотии «Азия Плюс» хабар медиҳад, варзишгари тоҷик Шоира Зулқайнарова дар вазни то 63 кг дар мусобиқоти қаҳрамонии ҷаҳон оид ба бокс байни занон, ки дар Истанбул (Туркия) ҷараён дорад, ба 1/4 финал баромад.

Шоира дар даври 1/8 финал бар Чеонг Хи Дун аз Кореяи Ҷанубӣ пирӯз шуд. Барои роҳ ёфтан ба даври ниманиҳоӣ ӯ бо муштзани ҳиндӣ Парвина Худа қувваозмоӣ мекунад.

Варзишгари дигари тоҷик Руҳафзо Ҳақназарова дар вазни то 50 кг дар даври 1/8 финал аз Ингрит Валенсия аз Колумбия шикаст хӯрд.

11 май Сумая Қосимова дар мусобиқаи қаҳрамонии бокси ҷаҳон байни занон дар нахустин қувваозмоии худ шикаст хӯрд. Қаблан Сумая Қосимова, ки дар вазни ҳадди ақал (то 48 кг) рақобат мекард, дар бозии аввал аз варзишгари булғорӣ Севда Асенова бо ҳисоби 0:5 шикаст хӯрд.

Мижгона Самадова дар рақобатҳо дар вазни то 57 кг аз Лин Ю Тинг (Тайбейи Чин) бо ҳамин натиҷа шикаст хӯрд. Дар Чемпионати ҷаҳон оид ба бокс миёни занон Тоҷикистонро дар маҷмӯъ 4 духтар намояндагӣ мекунанд. Мусобиқа дар Истамбул баргузор шуда, то 21 май идома хоҳад кард.

Дар он 419 варзишгар аз 93 кишвари ҷаҳон ширкат доранд, ки дар 11 вазн барои медалҳо мубориза мебаранд. Фонди ҷоизаи чемпионат 2,4 миллион долларро ташкил медиҳад. Дар ҳар як вазн ғолибон ва ҷоизадорон барои ҷои аввал 100 000 доллар, барои ҷои дуюм 50 000 доллар ва барои ҷои сеюм 25 000 доллар мегиранд.